за ,

Тестовите предупредуваат: Евтините гуми се опасни по живот

Германско здружение за техничка контрола тестираше шест евтини летни гуми од кинеско и источноевропско производство. Разликите во споредба со нормалните гуми се запрепастувачки.

Експертите на Германското здружение за техничка контрола тестираше шест гуми од најниската ценовна класа, со димензија 225/45 R17, како тие се однесуваат во поглед на должината на патот на сопирање, стабилноста при влажен пат и во поглед на возните својства. Како гума за споредба послужи квалитетен производ од докажана марка, а се тестираше на сериски Volkswagen Golf GTI.

Резултатите се запрепастувачки. При целосно запирање на влажен пат од брзина од 100 километри на час, дури и најдобрата од евтините гуми, со патот на сопирање од 56,2 метри заостанува за повеќе од шест метри во споредба со референтната гума, чијшто пат на сопирање од истата брзина изнесува 49,4 метри. Најлошата гума, пак, запира дури 12 метри подоцна, односно нејзиниот пат на сопирање е 61,9 метри. Тоа е разлика што во случај на опасност на патот и потреба од силно запирање може да повлече кобни последици. На местото на кое што возилото со референтните гуми запира по неполни 50 метри, со евтините гуми истото возило пролетува со брзини и до 44 километри на час – иако се работи за исто возило и исти услови на запирање.

Разликите се уште поголеми во поглед на однесувањето во свијок при воден слој на патот. Референтната гума го задржува правецот и со 80 километри на час и не дозволува под газечката површина да се создаде водениот клин што ја подигнува гумата од подлогата, т.н. аквапланинг, што би оневозможило каква било контрола, односно задржвуање на правецот на возење. Во истите услови на влажна тест патека, возилото со монтирани евтини гуми покажува изразено подуправување, односно силно влече со носот надвор од свијокот и не може да се контролира ниту со силно завртување на воланот. Најлошата евтина гума на тестот постигнува одвај 58 проценти од перформансите на референтната гума.

Слична е ситуацијата и во поглед на управливоста со евтините гуми. Уште при поаѓањето недостига тракција и погонските тркала пролизгуваат. Евтините гуми немаат никакви шанси: Слаб контакт со подлогата, недоволно странично држење, огромна чувствителност при нагло одземање гас или силно сопирање во свијок и апсолутно недоволна тракција. Запрепастувачки е тоа што некои од евтините гуми со летен профил се продаваат дури и со ознака М+Ѕ, односно како зимски гуми.

На сите овие слабости, на крајот се надоврзува и цената. Евтините гуми се продават по цени што се разликуваат за само 25 до 30 евра во споредба со гумите од квалитетните марки.

 

Во табелата се наведени резулатите од тестот на евтините гуми 225/45 R17.

 

Сопирање на влажен асфалт од 100 km/h

 

Марка Пат на сопирање Преостаната брзина
Westlake SV 308 56,2 m 33,5 km/h
Kormoran Gamma B2 57,2 m 35,8 km/h
Goodride SA05 57,3 m 36,0 km/h
Kenda KR20 60,4 m 41,6 km/h
Federal SS 595 60,5 m 41,8 km/h
Riken Maystorm 61,9 m 44,0 km/h
Референтна гума (Dunlop) 49,9 m   0,0 km/h

 

Напишано од Дарко Јаконов

Објавува текстови за автомобилизам од 1994 година, дел од оригиналната постава на магазинот Ауто Плус на Томислав Биљарац, главен уредник на првото лиценцирано издание на Ауто Билд Македонија, член на жирито за избор на европски автомобил на годината Ауто 1 на групацијата магазини Ауто Билд, во 2013 година ја основа Аутомедиа.

Напишете коментар

Вашата адреса за е-пошта нема да биде објавена. Задолжителните полиња се означени со *

Renault го загрозува третото место на Opel во Европа

Brabus ќе ја произведува најскапата верзија на класата S за Mercedes