Дарко Јаконов
Марката со спортските автомобили добива огромна поддршка од новиот партнер Mercedes. Германците се подготвени да ја отстапат платформата на GL за идниот теренец на Aston Martin.
При премиерата на новата класа V, шефот Дитер Цече изјави за медиумите дека неговата марка е „отворена да ја сподели платформата на GL со луксузната марка од Британија“. Во минатото првиот човек на британската марка Улрих Бец исто така планираше соработка со Mercedes во развојот на идниот спортски теренец, така што се чини дека нема пречки соработката меѓу двете компании да продолжи во реализација на овој план.
Aston Martin веќе покажа пред светот дека е расположен за спортски теренец. Во 2009 година Aston Martin Lagonda беше претставен на салонот во Женева како концептен автомобил. Реакциите на публиката за концептот на теренец Lagonda, кажан во најблага форма, не беа особено позитивни. Тоа беше единствената причина за Aston Martin да го напушти проектот и да им се посвети на своите престижни купеа.
Британската марка сепак тешко ќе опстои во конкурентската битка без модел во сегментот на спортските теренци. Lamborghini, Maserati и Bentley веќе подолго време работат на модел во овој сегмент и логично е дека и Aston Martin мора да реагира. Серискиот модел може да биде готов најрано во 2017 година. Тоа звучи како предолг период, но во приближно исто време ќе стартува и Lamborghini Urus.
Без разлика како ќе заврши намерата за соработка во заеднички развој на спортски теренец, сосема е извесно дека Aston Martin во блиска иднина ќе почне да ги вградува моторите од AMG-Mercedes во своите суперболиди.
