Дарко Јаконов
Од фабриката на Mercedes во Бремен денес излезе првиот примерок од кабриолетот од C-Class. За првпат во гамата на овој модел се нуди кабриолет изведба. Вкупно девет модели се произведуваат во Бремен.
Производственото портфолио на фабриката на Mercedes во Бремен го доби и деветтиот модел. Денес оттаму излезе првиот примерок од кабриолетот од C-Class, кој ќе се произведува на иста лента со C-Class Coupe, E-Class Coupe и E-Class Cabriolet. За првпат во историјата на моделот од средната класа се нуди и кабриолет изведба.
Основата за C-Class Cabriolet потекнува од купето, што значи дека се работи за лесна каросериска конструкција, со крила, хауба и капак на багажникот изработени од алуминиум. Во производството на кабриолетот е потребна голема флексибилност, поради многубројноста од бои на покривот (стандардно црна, а по избор темнокафена, темносина, темноцрвена) и опцијата за повеќеслојна звучна изолација. Монтажата на покривот, исто како и вградувањето на кокпитот, не се вршат автоматски, туку мануелно со помошен носач. Со сите варијанти на опрема и системи за асистенција, секое возило што излегува од погоните во Бремен е практично уникат.
Моментно во фабриката со 12.500 вработени се произведуваат девет модели: Лимузината, комбито, купето и кабриолетот од C-Class, купето и кабриолетот од E-Class, од неодамна спортскиот теренец GLC, како и родстерите SLC и SL. Летово пристига уште еден модел, GLC Coupe. Од Бремен се раководи со глобалната продукција на C-Class, како најпродавана моделска серија на Mercedes, којашто дополнително се произведува и во Таскалуза (САД), во Пекинг (Кина) и Ист Лондон (Јужна Африка).
