Дарко Јаконов
Новата генерација на Hyundai i20 пристига кога е најгусто во класата на градските автомобили, заедно со конкурентите Opel Corsa и Skoda Fabia. За толкава самоувереност, i20 мора да има високи вредности.
Во Париз доживеа светска премиера Hyundai i20. Новата генерација на градскиот автомобил на Hyundai е „европска во секој поглед“ – потенцираат од корејската марка. Hyundai i20 е дизајниран и развиван во европскиот центар на марката во Риселсхајм, Германија, а производството се одвива во фабриката во Турција. Според ветувањата на производителот, нoвиот i20 има значително подобрени возни својства и комфор, како и поголема просторна понуда во кабината.
Новитет во понудата на погонски единици е 1,4-литарскиот бензинец. Во следната година доаѓа и еднолитарски бензинец со турбонатполнење и три цилиндри, прв од новата генерација на мотори на Hyundai, развиени според принципот на „даунсајзинг“. Во најсилната изведба, овој мотор ќе ослободува моќност од 120 КС и вртежен момент од 172 њутнметри. Продажбата на моделот во Европа стартува во декември.
