Дарко Јаконов
На крајот на 2016 година пристига следната генерација на Audi Q5. Тестирањето е во напредна фаза за што сведочат и фотографиите од Поларниот Круг. Таму моментно се испробува хибридната изведба од моделот.
Во следната есен се очекува Audi да го претстави спортскиот теренец на база на актуелната генерација на Audi A4. Последната серија фотографии открива дека идниот Q5 веќе е во фаза на напредно тестирање во услови на екстремен студ во Поларниот Круг. Од фотографиите што се појавија претходно можеше да се види дека изгледот на теренецот од средната класа нема да претрпи значајни промени и ќе го следи принципот што Audi го примени кај лимузинскиот модел.
Повеќе треба да се очекува од техниката на новата генерација на Audi Q5. Во поглед на стандардната моторизација, во Q5 ќе се вградуваат бензинските и дизелските агрегати со четири и шест цилиндри од актуелниот A4, но комплетно нова техника се очекува кај моделот со хибриден погон со надворешно полнење на батериите. Кај возилото што сега е уловено на тестирање во Поларниот Круг станува збор токму за оваа верзија на моделот, чиишто батерии се испитуваат во услови на екстремен студ и мраз, исто како и новиот погон на сите тркала e-quattro.
Бензинец и електромотор за предната оска, втор електромотор за задната оска
Audi веќе прикажа како ќе функционира овој систем, преку концептниот автомобил Allroad Shooting Brake од 2014 година. Во него работи дволитарски TFSI со 292 КС, кој во комбинација со електромотор со 54 КС и менувач со двојна спојка е задолжен за погонот на предните тркала. За задната оска се грижи електромотор со 116 КС и на тој начин се реализира погонот на сите тркала. Електромоторите се снабдуваат со струја од литиум-јонска батерија што е вградена пред задната оска и на возилото му овозможува досег при возење на струја од 50 километри.
Уште не е потврдено официјално кога ќе стартува со продажба хибридната изведба, но доколку се следи актуелната практика на Audi, можно е плагин-хибридот да биде претставен шест месеци по комерцијализацијата на моделите со конвенционален погон, односно во средината на 2017 година. Затоа пак, напролет пристига хибридната верзија на Audi Q7, со трилитарски дизел со 258 КС и електромотор со 128 КС. Со преоѓањето на новата модуларна платформа од Audi A4 се очекува тежината на теренецот исто така да се намали за околу стотина килограми, а во исто време да се постигне и поголема просторност во кабината, поради порационалното искористување на просторот со новата платформа.
