Новата генерација на големиот теренец на Volvo ќе стартува со продажба во почетокот на 2015 година. Швеѓаните сега го прикажуваат прво ентериерот, а наесен следува и остатокот од XC90.
Ниту еден друг модел на Volvo претходно се нема појавено со толку луксузен ентериер каков што поседува новиот XC90 – убедени се во шведската марка. Најголемата иновација е во големиот дисплеј со формат на таблет, преку когошто се ракува со сите функции на возилото, место на класичниот начин со копчиња и регулатори. Во кокпитот е вградена импресивна доза на скапо дрво и мека кожа, на што се надоврзуваат рачка на менувач од кристал изработен од Orrefors, познат шведски производител на стакло, како и копче за регулирање на силината на радиото што прецизно е изрежено со дијаманти.
Седиштата ќе нудат врвен комфор и ќе поседуваат електромотори за дотерување на страниците на седиштето според телото, можност за дотерување на должината на седечката површина, лумбално местење и три меморирани позиции. Со доплата, во седиштата ќе се вградуваат вентилација и функции за масажа на телото. Купувачите ќе можат да изберат и спортски седишта, со оптимална поддршка.
Назад има три единечни седишта со надолжно местење, за повеќе простор за колената или за повеќе простор во багажникот. За средното седиште се нуди и интегрирано детско седиште. Големиот теренец ќе поседува и трет ред седишта, со комоција за патници високи до 1,70 метар што ќе биде врвна во класата. Со доплата, и тие може да се местат со помош на електромотори. Четиризонска автоматска клима ќе биде на списокот на дополнителна опрема, со посебни контроли за третиот ред и со зголемена моќ на филтрирање на воздухот.