Зошто Германците купуваат автомобили 43 пати повеќе отколку Македонците?

Ако „по дворот се познава домаќинот“, така и по автомобилите се познава добросостојбата на народот. Додека Македонија се залажува со увезени бугарски мерцедеси од минатиот век, кај „автонацијата“ се случува Passat да биде втор најпродаван автомобил и BMW да се продава повеќе од Opel.

Во последниве денови повторно се зборува за реалноста на македонската економија, експерти спомнуваат фингирани показатели, народот сфаќа дека всушност и не бил толку богат колку што прикажуваат „пренесувачите“ на вести. Многу работи може да се лажираат, но „уличната“ слика малку потешко. Некој некогаш рекол: Погледни какви автомобили вози народот, па оцени колку добро му оди. „Глетката“ во продажбата на нови автомобили во првиот месец од годинава открива 224 патнички и 35 доставни возила. Вкупно 249 возила сработиле дваесетината субјекти во продажбата на нови автомобили државава. Дали сега некој ќе се обиде да ги обвини продавачите што толку малку автомобили се продаваат во државата? Или можеби „добросостојбата“ не дозволува да се купи повеќе од бугарски мерцедес стар дваесет години, донесен од Германија за 1.000 евра, продаден во Македонија за 4.000 евра?

Само нов Golf во Германија се продава двапати повеќе отколку нов автомобил кај нас

Сигурно дека не може да се очекува ситуацијата со автомобилите да се разликува од сé друго во една држава. Автомобилите едноставно даваат „пластична“, јасна слика. За споредба, македонската врвна економија наспроти германската „обична“ економија, според продажбата на нови автомобили. Додека во јануари само еден на девет илјади Македонци купил нов автомобил, за истиот период, еден на 4.474 Германци купил нов Volkswagen Golf. Тоа значи дека Германците купуваат Golf двапати повеќе отколку што Македонците купуваат нов автомобил од која било марка и модел.

На пазарот постојат многу модели и многу марки, па на крајот се доаѓа до следниов сооднос: Со 434.591 продадени патнички и доставни автомобили во јануари 2015, при состојба на население од 82.652.256 жители, Германија продала 43,6 пати (!!!) повеќе возила по жител, отколку Македонија со 249 продадени патнички и доставни автомобили во јануари 2015, при состојба на население од 2.065.769 жители. Како ќе одговорат „бранителите“ на македонската економија за оваа најпростачка, најдилетантска и најнеспоредлива споредба? Како е можно Германците да купуваат 43 пати повеќе автомобили од нас Македонците, кога соодносот во просечната плата е приближно 1:10? Веројатно нашето едно е четири пати помалку вредно отколку германското едно. Можеби германската математика сепак се разликува од другите. Но, сигурно е дека Германците барем не би дозволиле простаци, дилетанти и неспоредливи историски примероци да ги убедуваат дека економијата им успева одлично, само што тие се виновни и не го чувствуваат тоа.

Првиот модел од премиум марка е дури на петтото место меѓу најпродаваните

Нашите автомобили ги гледаме секојдневно, и каде што треба, и каде што најмалку треба, а се потрајно ги чувстуваме и при секоја посета на лекар. Чесен исклучок се консументите на кампањите за здрава храна. Но, какви автомобили вози Германија? Триото Volkswagen е водечко со Golf, Passat и Polo, на првото, второто и третото место. Пиедесталот за малку го пропушта првиот модел од премиум марка, Audi A3, по когошто веднаш следи и вториот премиум модел, класата С на Mercedes. Тоа е реалноста, петти најпродаван модел е автомобил што вреди најмалку 30.000 евра според ценовник, а Германците не го возат за помалку од 40.000 евра. Рационалноста на германскиот купувач се враќа со Skoda Octavia на шестото место, и со првиот спортски теренец, со Volkswagen Tiguan, на седмото место.

Не-германски автомобил, не сметајќи ги марките што се дел од германските концерни, се појавува дури на 28-то место, тоа е Nissan Qashqai. Дури десет места погоре стартува првиот автомобил од вишата класа, Audi A6, чијашто продажба во јануари изнесува приближно колку на Seat Leon или Ford Fiesta.

Популарни и малечките и „обичните“ марки

Малечките нови автомобили, што е „незамисливо“ да се купуваат кај нас, покрај толку евтини и скапани дваесетгодишни лимузини што некогаш одамна му припаѓале на некој господин, пред да се најдат на плац на турски автодилер во „немачка“, па потоа и во Бугарија, па по истата градација кај наш возач, се чини дека сепак не се толку непопуларни за богатите и автомобилски описменети Германци, исто како и „рационалните“ марки. Но, не сме биле секогаш толку „африканизирани“ во поглед на пазарот на автомобили. Пред повеќе од половина деценија, учеството на автомобили стари до две години на нашиот пазар беше осумпати поголемо отколку лани. Или најконкретно, три од четири автомобили во Македонија моментно се постари од десет години. Тоа подразбира и дваесет години. Македонскиот народ има навика во вакви пригоди да прокоментира иронично: Нека ни е наздравје! Тоа што е уништено во автомобилската проблематика, уште долго време ќе мора да се поправа. Допрва!

Продажба на нови автомобили во јануари 2015 во Германија