Дарко Јаконов
Скапите олдтајмери обично носат лого на Ferrari, Mercedes или Bugatti. Јапонските марки ретко се среќаваат во оваа лига. Но, и тоа се менува. На едно наддавање, Toyota 2000 GT достигна цена од 900.000 евра.
Јапонските олдтајмери заостануваат далеку зад моделите од европските марки во поглед на тоа колку се зголемува нивната вредност со текот на годините. Овој заостаток во последниот период почнува да се смалува. Интересот расте особено за спортските модели на марките од Јапонија.
Најдобар пример за новиот тренд е Toyota 2000 GT. Во последниве десет години, цената на спортското купе на Toyota што се произведуваше меѓу 1967 и 1970 година се зголеми повеќе од двојно. Според официјалните каталози за процена на вредноста на олдтајмерите, во 2003 година ова купе произведено во 351 примерок вредело околу 95.000 евра, додека денес тоа се проценува на повеќе од 250.000 евра. Во април годинава, одлично сочуван примерок од серијата, на наддавање достигна цена од близу 900.000 евра.
Пазарните аналитичари на Classic Data очекуваат дека по примерот на „јапонскиот E-Type“, како што познавачите го нарекуваат купето поради сличноста со легендарниот модел на Jaguar, во иднина ќе почне да се зголемува цената и на другите спортски модели од јапонска продукција. Тоа важи особено за Datsun 240 Z, далечниот прапредок на денешниот Nissan 370 Z, како и на Mazda 110 S Cosmo, како прв сериски автомобил со ванкел мотор со два ротациски клипа.
