Во фабриката на Toyota во турската Сакарија започна сериското производство на новиот C-HR. Впечатливо дизајнираниот кросовер е осми модел на Toyota од европскиот регион и трет модел достапен и во хибридна изведба. На истата лента се произведуваат Corolla и Verso.
Производствените погони на Toyota во турскиот град Сакарија го зголемија капацитетот од 150.000 на 280.000 примероци специјално за новиот кросовер C-HR, којшто глобално ќе се произведува единствено во оваа фабрика. За таа цел, Toyota вложи дополнителни 350 милиони евра во погоните отворени во 1994 година и ангажираше уште 2.000 работници, за вкупниот работен персонал сега да изнесува 5.000 лица.
Осумдесет проценти од продукцијата во турската фабрика се извезува во европските држави. Со C-HR, оттука ќе се снабдуваат и пазарите во САД, Канада, Тајван, Маурициус и Јужна Африка. Toyota го смета C-HR за „вистински Европеец“. Погонот за хибридната верзија се испорачува од Северен Велс, а мануелните менувачи за верзијата со 1,2-литарски бензинец пристигаат од Полска.
Од 2018 година, тука ќе се произведува и хибридниот погон. Од 135 фирми во добавувачкиот синџир, 134 се европски, а дури 71 добавувачи се лоцирани во Турција. Вклучувајќи го C-HR, повеќе од три четвртини од продажбата на европска територија се покриваат со регионалната продукција на возила.
