Сите досегашни победници во изборот на европски автомобил на годината

Жирито на изборот за автомобил на годината во Европа штотуку ги избра седумте финалисти коишто ќе ги одмеруваат силите во завршната трка во февруари, за победникот да биде прогласен на посебен настан во рамките на салонот во Женева во март. Додека експертите одлучуваат на кој модел ќе ја доделат титулата за 2017 година, Automedia ви подготви кус историски преглед на изборот.

Одликувањето за автомобил на годината го иницираше Фред ван дер Влут, уредник на холандскиот магазин за автомобили Autovisie. Во 1963 година, тој заедно со 26 професионални новинари за автомобилизам од девет држави го состави првото експертско жири на изборот. Целта на Холанѓанецот со многубројното жири беше да се постигне поголема веродостојност на изборот и да се допре до најшироката јавност.

Изборот за автомобил на годината се организира од седум магазини од исто толку европски држави: Stern (Германија), L’Automobile (Франција), Auto (Италија), Autovisie (Холандија), VI Bilagare (Шведска), Autopista (Шпанија) и Autocar (Велика Британија).

Историски моменти од изборот за автомобил на годината:

• Англиската лимузина Rover 2000 од серијата P6 е првиот носител на титулата за автомобил на годината
• Fiat 124 прв ја донесе победата за италијанската марка. Fiat е најуспешниот производител во изборот, со дури девет победи.
• Honda Civic во 1974 година беше прв автомобил од азиски производител, којшто се најде меѓу најдобрите три модели во изборот
• Ford првпат победи во изборот дури со третата генерација на Escort во 1981 година
• Volkswagen Golf се искачи на највисокото место дури о 1992 година
• Во 1998 година Alfa Romeo 156 ја освои титулата за спортската марка
• Во 2005 година Toyota Prius ја понесе победата како прв хибриден автомобил
• Во 2011 година победник беше електричниот Nissan Leaf
• Една година подоцна повторно победи електричен автомобил, Opel Ampera / Chevrolet Volt.

Жирито се состои од 58 членови од 22 европски држави. Бројот на членови од една земја во составот на жирито зависи од големината на автомобилскиот пазар во земјата и од нејзиното значење во автомобилската бранша. Германија, Франција, Италија, Шпанија и Велика Британија имаат по шест членови во жирито, останатите земји имаат пропорционално помалку членови.

Најмногу титули има освоено Fiat, којшто девет пати е одликуван за Автомобил на годината во Европа, втор е Renault (6 пати), следат Opel и Ford (по 5 пати), Peugeot и Volkswagen (по 4 пати), Citroen (3 пати), Alfa Romeo, Audi, Nissan, Rover, Simca и Toyota двапати.

Сите победници во изборот за Автомобил на годината во Европа од 1964 година до актуелната Opel Astra