Honda го исполни сонот на основачот на фирмата и по копното и водата го освои и воздушниот простор. Honda Jet појде на промотивна тура низ светот, со „посета“ на 13 држави и лет од преку 48.000 километри.
Од меѓународниот аеродром во Токио, познат и како аеродром Ханеда, започна светската тура на Honda Jet, лесниот бизнис авион со млазен погон на Honda. Во светската тура е предвидено млазниот авион да прелета повеќе од 48.000 километри и да ги „посети“ аеродромите во 13 држави, кадешто ќе бидат извршени демо-летови.
Со влегувањето во аеронаутичката индустрија, Honda ја освои и третата димензија, што било цел и на основачот на фирмата, Соичиро Хонда. Моторот е сопствен производ на Honda, со ознака HF120 GE и според конструкторите ќе постави нови стандарди во поглед на перформансите и комфорот во сегментот на лесните бизнис авиони со млазен погон. Авионите се новиот предизвик за Honda, покрај мотоциклите, автомобилите, бродските мотори и електричните апарати, роботиката и погонот на водород.
