Валтер Мариа де Силва на крајот на ноември заминува во пензија. Првиот човек за дизајн во целиот концерн Volkswagen беше задолжен за изгледот на сите марки уште од 2007 година.
Валтер Мариа де Силва е роден на 27-ми февруари 1951 во Леко, Италија, а со работа во концернот Volkswagen започна пред 17 години, откако беше поставен за главен дизајнер во центарот на Seat во 1998 година. Од 2002 година, де Силва стана одговорен за дизајнот на марките од тогашната групација Audi, односно за самата марка Audi, за Lamborghini и за Seat, за пет години подоцна да го презеде одлучувањето за изгледот на сите марки од концернот Volkswagen. Главното тежиште во работата на де Силва беше поставување на дизајнерска култура што ќе биде заедничка и препознатлива за сите марки на германскиот концерн.
Професионалната кариера на Валтер де Силва почнува во 1972 година, во дизајнерскиот центар на Fiat во Торино. Три години подоцна, италијанскиот дизајнер почнува да работи во студиото на Р. Бонето во Милано. Од 1979 до 1986 година, тој е раководител во подрачјето на индустриски дизајн и автомобили во познатиот Instituto Idea во Торино. По кусата работа во „Trussardi Design Milano”, од 1986 година тој почнува да работи за Alfa Romeo, кадешто останува како главен дизајнер до 1998 година.
Меѓу највпечатливите возила потпишани од де Силва се Alfa Romeo 156 (1997) и 147 (2001), Volkswagen Up и последните две генерации на Golf, како и Audi R8 и Audi A5, кого што тој самиот го смета како „најубав автомобил“ што воопшто го има дизајнирано. За своите дела, де Силва добива бројни признанија. Audi A5 во 2010 година ја добива наградата за дизајн на Германија, како највисоко одликување за дизајн во земјата, а во 2011 година е одликуван со „Compasso d’Oro” (златен компас), една од најреномираните награди за дизајнери во Италија. Меѓународно стручно жири го инаугурираше Валтер де Силва како „прогатонист на италијанскиот дизајн“, одликувајќи ја неговата 40-годишна кариера.
