На десетте ветерници кои ја снабдуваат со струја фабриката на Nissan во британскиот Сандерленд, сега им се придружуваат уште 19.000 соларни панели. Во фабриката се произведува и електричниот шампион Leaf.
Nissan ја вклучи новата соларна фарма во снабдувањето со струја на фабриката во Сандерленд, најголем погон на јапонската марка во Европа. Соларната фарма ја сочинуваат 19.000 фотоволтаички панели, со капацитет од 4,75 мегавати. Ова претставува чекор напред во настојувањето на Nissan да ја сведе емисијата на издувни гасови на нула, како во производството, така и во експлоатацијата. Во Сандерленд се произведува и електричниот модел Leaf, како и батериите за него.
Дел од енергетската потреба на фабриката досега се покриваше од десет ветерници, од кои првите се поставени уште во 2005 година. На нивниот капацитет од 6,6 мегавати, сега им се придружуваат и соларните панели, со капацитет од 4,75 мегавати, односно вкупно 11,35 мегавати добиени од одржливи извори. Алтернативната енергија моментно учествува со 7 проценти во покривањето на вкупната потреба од енергија на Сандерленд, доволно да се произведат 31.374 возила.
