Поседувањето олдтајмер е скапо задоволство, поседувањето олдтајмер Mercedes уште поскапо. Задоволството сепак може да се дозволи на неколку денови, како туристички аранжман со директно посредство на марката.
Романтично крстосување по кривулестите патчиња покрај брегот на Југот на Франција во Mercedes SL од 1970-те години? Или можеби дневна тура низ чемпресовите шуми, виноградите и маслиновите насади во Тоскана и уживање во вечера од регионалната кујна? Тоа се чини како совршен неколкудневен одмор за секој љубител на марката од Штутгарт, но и не само за нив. Mercedes отсега го нуди ова ексклузивно патување со олдтајмер од генерациите W 113 и R 107 на родстерот SL. Туристичкиот пакет „Classic Car Travel“ е во режија на Daimler Business Innovation, огранок на гигантскиот концерн кој се грижи за пронаоѓање нови подрачја за бизниз.
https://www.instagram.com/p/BD-lve0iSLz/?tagged=classiccartravel
На располагање стои возен парк од десет примероци од Mercedes W 113, произведуван меѓу 1963 и 1971 година и од наследникот R 107, произведуван меѓу 1971 и 1989 година. Возилата може да се заменуваат во текот на турата, за клиентите да можат да испробаат повеќе модели и различни мотори.
Рутите за возење се избрани грижливо од страна на партнерот Nostalgic од Минхен, кој уште од 2003 година е специјализиран за овој вид на олдтајмер-аранжмани и сега во својата понуда ги вклучува и овие родстери посакувани од многумина. Клиентите за патувањето добиваат мапа за навигација, која што детално ги води по целата рута, сместување во реномирани хотели и придружен сервисен тим. Првите тури се предвидени за најмногу 18 лица и водат низ Франција и Италија.
Цената е 1.975 евра по лице, вклучувајќи трансфер до аеродром, автомобилско и патничко осигурување, хотелско преноќување со појадок, трошоци за бензин и патарина, влезници за знаменитостите по пат и подарок од Mercedes.
