Секоја четврта Toyota во Европа вози со хибриден погон

Toyota лани продала 874.000 возила на европскиот пазар, од кои речиси една четвртина биле модели со хибриден погон. И покрај евтините горива, тоа е нов рекорд за хибридите на марката.

Ниските цени на горивата очигледно не ги поколебаа купувачите да се решат за хибридните модели на Toyota. Специјалистот и пионер на штедливиот погон со две срца лани испорачал 209.000 хибридни модели на европскиот пазар, што е зголемување за 17 проценти и нов рекорд за марката. Значаен удел во овие бројки има и луксузната марка Lexus, чиишто модели лани доспеале до 64.000 европски купувачи (+20%), и тоа е уште еден рекорд.

Гледано само во земјите во Западна Европа, секој трет продаден автомобил на Toyota и Lexus е со хибриден погон, додека за целиот европски пазар, уделот на хибридите достигна 24 проценти. Шефот на европската Toyota, Јохан ван Зил, ги препознава причините за растечкиот интерес: „Нашите одлични резултати од продажбата на хибриди покажуваат дека европските купувачи не се двоумат покрај падот на цените на нафтата и се привлечени од предностите на возењето хибрид, а тоа не е само штедење гориво и емисија на штетни материи.“ Овие предности, според Зил, се тивкото возење, ниските трошоци и користењето на електричниот погон без стравување од малиот досег.

Третина од продажбата на Yaris во Европа отпаѓа на достапниот хибриден модел, кој лани достигна 72.000 примероци или 23% повеќе отколку преклани. Уште поубедливо е учеството на хибридната изведба на Auris. Секој втор купувач на компактниот модел во Европа ја користи помошта од електромоторот во возењето. Lexus, пак, речиси целосно е хибридна марка, особено во Западна Европа, со 96% удел на хибридните модели во продажбата. Од вкупната продажба на луксузната марка во Европа, две третини се хибридни возила.

До 2020 година се предвидува продажбата на хибридните модели на Toyota и Lexus на европскиот пазар да надмине 400.000 примероци. Офанзивата почнува веќе годинава, со пристигањето на новата генерација на Prius, како и со воведувањето на хибридниот погон во кросоверот RAV4. Осамен во понудата во сегментот на кросоверите, конкурентот Mitsubishi постигна вистински продажен бум со својот Outlander PHEV.