Премиера на комби моделот од Mercedes E-Class

Транспортерот на база на класата Е досега не внимаваше особено на линијата. Но, како многу други работи во Mercedes, тоа се смени со новиот T-Modell. Пневматиката на задната оска е стандард, исто како и багажникот од 1.820 литри.

Комбито од класата E на Mercedes го имаше решавачкиот удар на тенискиот турнир во Штутгарт. Шестата генерација на T-Modell, како што традиционално се водат комби моделите во номенклатурата на марката, имаше премиера во рамките на купот на Mercedes. Како што стана вообичаена практика на марката, паралелно беше претставена и верзијата од AMG, со трилитарски V6 во моделската изведба Mercedes-AMG E 43 4Matic.

Тоа што T-Modell го има како екстра квалитет наспроти лимузината од E-Class секако е багажникот, а таму собира максимално 1.820 литри. Тоа е врвна вредност во класата, иако дизајнерите се погрижија да внесат малку подинамична нота во изгледот на опашот, што инаку би одело на сметка на транспортниот капацитет. Кон крајот на годинава, T-Modell повторно ќе биде достапен и со трет ред седишта, кој се собира во подот.

Основните и врвните моделски изведби пристигаат во последното тримесечје

Понудата од моделски изведби е иста како кај лимузината: E 200 со 184 КС и Е 220 d со 194 КС како основа на понудата, E 250 со 211 КС како привремен врв. Во последното тримесечје следуваат E 200 d со 150 КС, E 350 d и E 400 4Matic, последниов со 333 КС и 480 њутнметри. Сите модели стандардно се испорачуваат со 9-степен автоматик. Како прв член од моќниците во гамата пристига Mercedes-AMG E 43 4Matic со 401 КС, достапен исто така од последното тромесечје.

Технички податоци Mercedes E-Class T-Modell

Стандардната големина на багажникот изнесува 670 литри и тоа меѓу најдарежливите понуди во сегментот. Новитет е можноста задната клупа да се исправи за 10 степени, со што се обезбедуваат дополнителни 30 литри простор. Доплата за поделена задна клупа во сооднос 40:20:40 повеќе не е потребна. Соборувањето по електричен пат се врши преку прекинувачите во багажникот или копчињата странично од клупата.

Цела европалета во багажникот на транспортерот од E-Class

Како еден од ретките во класата, во багажникот на E-Class T собира цела европалета. Практичната двојна прекривка остана од претходникот, со подигнување под дејство на електромотор при отворање на капакот. Електромоторите за ракување со задниот капак следуваат како стандард, новитет е опционалниот сензор под браникот, кој реагира на движење со стопалото и го отвора или затвора капакот. Mercedes нуди и опција за посебни држачи со коишто може безбедно да се прицврсти различен товар во багажникот, вклучувајќи и шини по коишто лизга подот.

Со пневматска амортизација на задната оска и автоматско дотерување на висината на опашот во зависност од товарот излегува секој примерок од T-Modell од фабриката. На тоа се должи и носивоста до 745 килограми, како и тежината на приколка до 2,1 тон. Секако дека и кај комбито може да се доплати за пневматика и на предната оска.

Носач за четири велосипеди со вкупна тежина до 100 килограми

Камперите и занаетчиите ќе го ценат тоа што влечната кука сега се собира и извлекува по електричен пат, доаѓа заедно со специјална контрола на стабилност при влечење приколка и асистенција при страничен ветар – како опција. Иновација на Mercedes се двата држачи за велосипед изведени во самата кука, на коишто може да се постават до четири велосипеди со вкупна тежина до 100 килограми.

[FAG id=24634]