Овие пет аждери ја чекаат спортската изведба на Toyota Yaris

Toyota ја најави премиерата на спортската изведба на Yaris за март, на салонот во Женева. Од јапонската марка мудро ја подгреваат атмосферата со навестувањето дека малечкиот спортист ќе располага со повеќе од 210 КС. Конкуренцијата со којашто ќе се соочи Yaris воопшто не е наивна, таму има неколку големи имиња.

Двестотини коњски сили во автомобил од градската класа се вредност што ветува добра забава. Но, според тоа колку силно гризат овие мини тркачи, нивниот развој за производителите е сé друго освен забава. Ferrari 308 GTB во 1980-та година имаше само седум коњски сили повеќе од најсилниот претставник на актуелната генерација малечки спортисти и за тоа му беше потребен трилитарски V8 – и четири двогрли карбуратори. Денес работата ја завршува 1,6-литарски четирицилиндарец со турбонатполнење.

Ако се исклучат премиум моделите во градската класа, како Mini John Cooper Works или Audi S1 quattro, обата со по 231 КС, кои чинат колку здрав спортски компакт и во тој поглед се сосема бесмислени, нормалните големоволуменски производители во моментов нудат десетина модели и моделски изведби што се движат околу звучната бројка „200“.

Најсилното спортско мини има само 7 КС помалку од Ferrari 308 GTB од 1980

Трката ја предводи Renault Clio R.S. Trophy EDC со 220 КС, веднаш по него следат Peugeot 208 GTi со 208 КС и Opel Corsa OPC со 207 КС, за петорката со мал заостаток да ја комплетираат Ford Fiesta ST200 и Volkswagen Polo со 192 КС. Во игра влегуваат и Seat Ibiza SC 1.9 TSI, како шпанска верзија на GTI, Renault Clio RS со 197 КС и Ford Fiesta ST со 182 КС.

„Веродостојна“ споредба: Ferrari 308 GTB со 227 КС и трилитарски V8 забрзуваше до сто за 6,1 секунди и постигнуваше 255 km/h во 1970-те години

Во март е сосема извесно дека врвот ќе ѝ припадне на уште неименуваната спортска верзија на Toyota Yaris, за којашто засега се знае само дека ќе располага со повеќе од 210 КС, според промислено штурата најава од јапонскиот производител. Toyota ја крунисува гамата на својот втор најмалечок модел со лута верзија, во знак на одбележувањето на стартот на Yaris WRC во светското првенство во рели и враќањето во највозбудливата гранка во мотоспортот по пауза од 17 години.

Во спортскиот Yaris ќе работи модифициран 1,6-литарски „глобален тркачки мотор“ (GRE) со најмалку 210 КС

Намерата на Toyota да ја продолжи традицијата на спортски модели со коишто се подржуваат хероите на тркачките патеки беше откриена уште на салонот во Франкфурт во 2013 година, со премиерата на концептот Yaris Hybrid-R. Овој тркачки монструм го донесе новиот 1,6-литарски „Global Race Engine“ со турбополнач од Garett со максимален притисок од 2,5 бари, со директно впрскување под 200 бари и моќност од 300 КС, развиен од специјалистите за мотоспорт на Toyota во Келн. Заедно со двата електромотора со по 60 КС за задните тркала, Hybrid-R располагаше со моќност од 420 КС.

Toyota ја најави спортската изведба на Yaris уште во 2013 година, со концептот Yaris Hybrid-R со хибриден погон со 420 КС 

Дури и во дизајнот на идниот Yaris GR Sport, или којзнае каква ќе биде ознаката, препознатливи се детали од концептниот автомобил од 2013 година. Моторот останува, во припитомена верзија со преполовена моќност и веројатно десеткратно зголемена издржливост, но електромоторите за жал мора да отпаднат од планот, затоа што автомобилот сепак мора да остане во нормална ценовна рамка што ќе биде разумна за пазарот. И погонот на сите тркала ќе беше добар за забавата, особено со можноста за варијабилна испорака на вртежниот момент за секое тркало.

Спортските верзии не се нови во гамата на Yaris, ниту се заборавени. Во Европа моментно е поинтересна хибридната верзија на Yaris, но откако марката ќе почне повторно да вози по рели-патеките, веројатно ќе проработат тркачките гени кај познавачите и фановите на Toyota, па имиџот ќе разграни и кон релито.

Ова се лутите конкуренти што чекаат спортскиот Yaris да се намести на стартната линија во март.

[FAG id=27034]