Дарко Јаконов
Производителот на мотоцикли Yamaha планира сериозно да влезе во автомобилскиот бизнис. Јапонците ќе прикажат нова студија на автомобил на претстојниот салон во Токио.
Јапонската марка Yamaha уште еднаш ги потврдува амбициите да влезе во автомобилскиот бизнис со студијата на спортски автомобил што ќе биде претставена на салонот на автомобили во Токио на 29-ти октомври. Освен нејасна слика што ја прикажува само силуетата на возилото, засега нема конкретни информации околу студискиот автомобил. Во секој случај се работи за компактен спортски двосед со класична погонска конфигурација, односно со мотор назад. Како што наведува Yamaha во најавата на салонот, намерата е да се прикаже автомобил што ги поседува типичните дизајнерски карактеристики на мотоциклите на марката.
Слични планови постоеја уште во почетокот на 1990-те години, но поради јапонската финансиска криза, тогашниот суперспортски автомобил со дванаесетцилиндарски мотор не доживеа реализација во сериското производство. Последен пат Yamaha изненади со студија на градски автомобил со електричен погон, на салонот во Токио пред две години. Според јапонските медиуми, сериската верзија на двоседот со име Motiv.е веќе e подготвена и од 2019 година ќе стартува со продажба и на европскиот пазар. Новиот студиски автомобил навестува дека е можно на градскиот двосед да му се придружат повеќе модели.
