Toyota е марка што најмногу се заложила за хибридниот погон, но и дизелските мотори не смее да се запостават. Место да развива сопствени дизели, марката во иднина ќе се потпира на помошта од BMW.
По пионерскиот чекор со Verso 1.6 D-4D, во блиска иднина ќе следуваат уште многу други модели на Toyota под чија што хауба ќе работи баварско срце. Компактниот ван беше прв модел штo ги искористи придобивките од новото партнерство со BMW, со 1,6-литарскиот дизел со 110 КС преземен од Mini Cooper D. Германските дизели ќе им помогнат на Јапонците да ја спуштат емисијата на СО2 на дозволеното ниво, без притоа да се жртвуваат перформансите.
Тоа што можеше да се претпостави по чекорот со Verso, сега и официјално е потврдено од одделението за развој и истражување на Toyota во Европа: Повеќе други модели на Toyota во иднина ќе го користат 1,6-литарскиот дизел на BMW, вклучувајќи ги компактот Auris и кросоверот RAV4. Покрај овој мотор, јапонската марка ќе го користи и поголемиот дизел на BMW, со зафатнина од 2,0 литри. Новите дизели постепено ќе се воведуваат во понудата на Toyota, што ќе придонесе да се зголеми продажбата на европскиот пазар, каде што интересот за хибридните модели на марката уште заостанува зад пазарите во САД или во Азија.