за

Toyota стартува со нарачки за C-HR веќе од октомври

Јапонците пристигаат со доцнење во сегментот на малечките кросовери, но затоа имаат што да понудат: Впечатлив изглед, одлична опременост и верзија со хибриден погон, како најголем адут пред конуренцијата. Toyota C-HR со цената сепак цели повисоко во класата.

Најголемите пазари во Европа ќе стартуваат со нарачки за новиот кросовер на Toyota веќе од почетокот на следниот месец. Како и вообичаено, германскиот пазар прв ги добива цените за новите модели. Во основната изведба со 1,2-литарски бензинец со турбо натполнење и 116 КС, новиот C-HR на овој пазар стартува од 21.990 евра.

Покрај верзијата со преден погон, достапна е и моделска изведба со погон на сите тркала, којашто доаѓа единствено во комбинација со автоматизиран менувач Multidrive S. Кросоверот со каросерија во стил на купе се нуди и во хибридна изведба, со 1,8-литарски бензинец со 98 КС во комбинација со електромотор со 72 КС и погон напред. Просечната потрошувачка според Toyota изнесува 3,8 литри. Подетални технички податоци ќе следат наскоро.

Toyota C-HR

Вкупно четири нивоа на опрема им се нудат на купувачите, кои за германскиот пазар ги носат имињата C-HR, Flow, Style и Lounge. Второто ниво на опрема поседува мултимедиски систем со дисплеј од 4,2 инчи, автоматски клима уред, сензор за дожд, кожа на воланот, сребрени украси во внатрешноста и алу-бандажи од 17 инчи. Како што укажува и името, следното ниво Style доаѓа со двобојна каросерија, виолетово-сини детали во внатрешноста и црно-сини седишта, додека во врвното ниво Lounge единствени опции шро преостануваат за доплата се озвучување JBL, кожени седишта и диодни светла.

Примерна безбедносна опрема уште во основната моделска изведба на C-HR

Безбедносната опрема уште во основниот модел опфаќа систем за самостојно запирање при опасност од судир и препознавање пешаци на патот, систем за следење лента со активна корекција на правец, автоматика за долго светло и приспособлив темпомат.

Toyota C-HR

Toyota C-HR е втор обид на Јапонците во сегментот на малечките кросовери. Во периодот меѓу 2009 и 2014 година марката го нудеше Urban Cruiser, кој беше осмислен совршено, освен што се појави неколку години пред големиот бум и го пропушти заслуженото место на пазарот. Новиот модел во изгледот се издвојува радикално од конкуренцијата, а го има и хибридниот погон, како најсилен адут. C-HR на пазарот ќе се соочи со Nissan Juke, Renault Captur, Honda HR-V и уште неколку силни играчи. Производството се одвива во фабриката на Toyota во Турција.

[FAG id=25543]

Напишано од Дарко Јаконов

Објавува текстови за автомобилизам од 1994 година, дел од оригиналната постава на магазинот Ауто Плус на Томислав Биљарац, главен уредник на првото лиценцирано издание на Ауто Билд Македонија, член на жирито за избор на европски автомобил на годината Ауто 1 на групацијата магазини Ауто Билд, во 2013 година ја основа Аутомедиа.

Напишете коментар

Вашата адреса за е-пошта нема да биде објавена. Задолжителните полиња се означени со *

Mercedes E-Class за сите терени

Македонија доби „место за вдишување на духот на Порше“