Дарко Јаконов
Производителот на електрични возила од Калифорнија за прв пат во десетгодишната историја забележа профит. Заслугата за успехот е во одличната продажба на новата лимузина Tesla S.
За првиот квартал Tesla пријави заработка од единаесет милиони долари, откако во истиот квартал во минатата година изгуби речиси 90 милиони долари. Соодветно на тоа порасна и вредноста на акциите на Tesla на берзата, за дури 26 проценти.
Од почетокот на годината се продадоа 4.900 примероци од новата лимузина со погон на струја Tesla S, што е за 400 повеќе од планираното. „Задоволни сме со добрата продажба на Model S на глобално ниво“, пишува во дописот на основачот и шеф на фирмата, Илон Маск, до акционерите во фирмата.
Tesla е технолошки предводник на погонот на струја. Високите трошпоци за развој на возилата и стартувањето со сопствено производство доведе до големи загуби во минатите години. Сега конечно се исплатеше долгото трпение на инвеститорите.
Daimler и Toyota се меѓу фирмите што вложуваат средства во иднината на Tesla. Обете фирми ја користат техниката од фирмата од Калифорнија за своите возила. Германците влегоа во Tesla во 2009 година, уште пред фирмата да се појави на берзата во средината на 2010 година. Догодина доаѓа кросоверот Model X, како трет модел во историјата на марката, по легендарниот Roadster и по лимузината Tesla S.
