за

Renault Twingo: 20 години млад!

Twingo одбележува 20-годишнина. Моделот предизвика огромно внимание со дизајнот, необичниот концепт и забавниот карактер, постигнувајќи продажба од 2,5 милиони примероци.

Во 1989 година Renault му даде налог на шефот за развој Ив Дубре да конструира автомобил што ќе биде компактен, штедлив и комфорен, без притоа да ги разниша темелите на големата сестра Clio. За разлика од конкурентите, Twingo се нудеше во само една моделска изведба со 1,2-литарски бензинец со 55 КС и со едно ниво на опрема. На тој начин меѓу другото се постигна и ниската цена на моделот. Изборот на бои исто така беше ограничен. Во почетокот Twingo се нудеше во сина, црвена, зелена и жолта боја. Од дополнителната опрема можеа да се изберат само клима уред и платнен покрив.

Оригиналноста на малечкиот Renault беше во моноволуменската каросерија, која овозможи максимално искористување на просторот и пристојна големина на кабината, гледано во однос на должината на возилото. Во тој момент не постоеше друг модел во класата со повеќе простор во кабината, благодарение и на лизгачката задна клупа. Покрај тоа, сите четири седишта се соборуваа – Twingo се претвораше во спална соба.

Хронологија на Renault Twingo:

Март 1993: Комерцијализација, а неколку месеци подоцна и премиера на салонот во Париз

1994: Французин извозе 240.000 километри низ австралиската дивина, докажувајќи ја издржливоста на Twingo

1994: Почеток на продажба на Twingo Easy со полуавтоматски менувач

1996: Специјални серии во ограничен број примероци Benneton и Matic, со тристепен автоматски менувач и посилен мотор со 60 КС

1998: Прв фејслифт со модификации во подвозјето, седиштата, кокпитот, светлата и предниот браник. Renault ја понуди и ограничената серија Elite

1999: Луксузна верзија Initiale Paris

2000: Модел 16V со мотор со 75 КС и роботизиран менувач

2005: Ограничена серија Kiss Cool

28 јуни 2007: Произведен е последниот Twingo од првата генерација во Европа, со 2.075.300 продадени примероци во 14 години

2012: Twingo продолжи да се произведува во Колумбија до 2012 година. На локалниот пазар моделот се продаде во повеќе од 100.000  примероци. Последната специјална серија е Twingo Tatoo

Напишано од Дарко Јаконов

Објавува текстови за автомобилизам од 1994 година, дел од оригиналната постава на магазинот Ауто Плус на Томислав Биљарац, главен уредник на првото лиценцирано издание на Ауто Билд Македонија, член на жирито за избор на европски автомобил на годината Ауто 1 на групацијата магазини Ауто Билд, во 2013 година ја основа Аутомедиа.

Напишете коментар

Вашата адреса за е-пошта нема да биде објавена. Задолжителните полиња се означени со *

Шефот на PSA Peugeot Citroen се откажа од милионската пензија

Volkswagen ги научи Американците да возат дизел