Овој модел на Porsche требаше да биде првиот автомобил со четири врати од спортската марка, долго време пред Cayenne и Panamera.
Спортската марка од Цуфенхаузен планираше да го понуди Porsche 989 како прв модел со четири врати. Проектот сепак замре во 1991 година, затоа што шефовите тогаш уште не веруваа дека автомобилот ќе постигне позначаен успех на пазарот. За развој на моделот беше задолжен експертот Улрих Бец, кој го напушти BMW и почна да работи за Porsche во 1988 година. Откако Бец замина и од Porsche во 1991 година, престана и работата на проектот за „989“, несудениот прв Porsche со четири врати.
Се веруваше дека единствениот изработен прототип бил расклопен кусо време по откажувањето на проектот. Но, очигледно е дека сепак постои примерок од овој автомобил. Porsche 989 поседува мотор V8 со работна зафатнина од 4,4 литри, развиен во Audi, којшто на купето со четири врати и простор за четворица патници му обезбедува крајна брзина од 280 километри на час.
Техничката основа потекнува од Porsche 928, еден од најзапоставените класични модели на марката. Експериментот воопшто не беше евтин. Porsche разви тогашни 600 милиони марки во развојот на купето со четири врати. Место 989, прв Porsche со четири врати беше спортскиот теренец Cayenne, па дури потоа следи Panamera. Многумина и денес сметаат дека 989 има поуспешна форма од актуелната купе-лимузина. Штета е што овој модел не успеа да доживее сериско производство и што не пројдоа ниту натамошните обиди за изведување на слична каросериска форма од следните купе модели на Porsche.