Дарко Јаконов
Две возила со чисто електричен погон Peugeot e-208 победија во своите категории и во вкупен пласман, додека во категоријата на хибридни возила победи екипажот во новиот Peugeot 308, во верзијата со приклучен хибриден погон. Марката со лавот го освои и трофејот за конструктори во купот со елеткрични возила.
Три екипажи со модели на Peugeot учествуваа на третото издание на Трофејот во електромобилност што се одржa во Чешка меѓу 8-ми и 10-ти јули. Релито во коешто учествуваат автомобили со електрифицирана погонска спрега и бодови се освојуваат со исполнување на патните репери, се вози во рамките на традиционалното Бохемија Рели.
Во категоријата на електрични автомобили, марката со лавот ја претставуваа два екипажи со Peugeot e-208: Едниот екипаж вози за Autoforum Electric и го сочинуваат Лукаш Дитрих и Милош Дитрих, вториот е K+N Peugeot, составен од Криштоф Хајек и Никола Прошакова. Втората категорија во којашто триумфираше Peugeot се хибридните автомобили. Искусниот тим на Peugeot MOTORVIZE.cz, составен од Јан Новотни и Петр Јакушек, годинава учествуваше со новиот Peugeot 308 во верзија со приклучен хибриден погон. Дуото во 2020 година победи на Еко Рели Бохемија со e-208, а годинава го повтори успехот со хибридниот 308.
Релито се возеше во регионите на Либерец и Млада Болеслав, на предизвикувачка рута за учесниците. Вкупната должина на итинерерот изнесуваше 478 километри, коишто требаше да се извозат за три денови. Стартот беше во Чешка Липа, од автодромот Соснова. Тука се докажаа динамичните возни својства на Peugeot 308. Тимот Новотни / Јакушек постави најбрзо време и ги победи многу посилните возила на конкурентите.
Тимовите во релито понатаму имаа предизвик да пристигнат на одредено место во одредена временска рамка. Во првиот ден, „трката во регуларност“ покриваше мерено возење во должина од 75,29 километри. Предизвикот во двата последни денови беше во возењето во мрак, што ја отежнуваше навигацијата. Тимовите во Peugeot се докажаа уште во првиот ден и ги освоија првите места во своите категории. Супериорноста на „лавовските тимови“ продолжи и во саботата и неделата.
