Дарко Јаконов
Производителите долго време експериментираат со мотор со променлив степен на компресија, но Nissan е тој што прв го прави чекорот и го најавува овој револуционерен мотор во сериско производство.
Под благородната марка Infiniti, Nissan ќе го претстави првиот мотор со променлив степен на компресија што е подготвен за сериско производство. Премиерата на моторот VC-T (Variable Compression – Turbocharged) е најавена за салонот во Париз, кон крајот на септември. Инженерите на јапонскиот производител подолго од 20 години ја развиваат иновативната технологија, којашто наскоро ќе доживее сериска примена.
Дволитарскиот VC-T претставува голема револуција во конструирањето на автомобилските мотори, позначајна дури и од воведувањето на впрскување на горивото под висок притисок кај дизел моторите или од примената на турбонатполнење и варијабилна фаза на брегастите вратила. Според шефот на Infiniti, Роланд Кригер, „технологијата VC-T претставува револуционерен чекор напред во подобрувањето на ефикасноста на моторите со внатрешно согорување.“
Моќност на шестцилиндарец, штедливост на трицилиндарец
Бензинецот со променлива компресија и турбонатполнење спојува моќност на 3,5-литарски шестцилиндарец и штедливост на 1,6-литарски мотор, односно е за околу една четвртина поштедлив од стандарден дволитарски бензинец со турбонатполнење, при значително подобри перформанси.
Од јапонската марка засега не откриваат повеќе детали околу техниката во VC-T и наведуваат дека промената на компресијата се постигнува преку зголемување и намалување на одот на клиповите. Последувателно се менува и работната зафатнина на моторот. Степенот на компресија се движи меѓу 8:1 (за високи перформанси) и 14:1 (за висока ефикасност). Интелигентната електроника автоматски го одредува оптималниот степен на компресија според условите на возење.
Nissan ветува и драстично намалување на бучавата и вибрациите
Предностите на технологијата VC-T се во намалената потрошувачка на гориво и емисија на штетни материи, драстично намалување на бучавата и на вибрациите на моторот. Покрај тоа, моторот е покомпактен и полесен во споредба со конвенционалните мотори со споредлива моќност и работна зафатнина.
Светската премиера на VC-T ќе се одржи на салонот во Париз, на 29-ти септември, додека првите сериски модели со овој мотор се очекува да се појават во продажба во почетокот на 2018 година.
