Секое десетто возило со електрифицирана погонска спрега продадено лани на европскиот пазар било Mitsubishi Outlander PHEV. Поголема продажба има остварено електричниот Renault Zoe, со 21.337 примероци или само 9 повеќе од Outlander. Тоа што шампионот на хибридниот погон Toyota отсуствува од овој сегмент се должи на фактот што Јапонците остануваат верни на класичниот хибриден погон – но, затоа лани продале близу 300.000 хибридни возила само во Европа.
Mitsubishi Outlander PHEV води неприкосновено на европскиот пазар на плагин-хибриди, односно автомобили со хибриден погон коишто располагаат со можност за надворешно полнење на батериите со приклучување на полнач за струја и со енергијата во батериите постигнуваат реален досег од околу четириесетина километри. Лани во Европа се продале 21.328 примероци од Outlander PHEV, со голема предност во споредба со второпласираниот Volkswagen Passat GTE со 13.248 примероци.
На јапонскиот семеен кросовер отпаѓаат 10,2 проценти од продажбата на возила со електрифицирана погонска спрега, што значи плагин-хибриди и електрични возила. Најголем пораст во продажбата во споредба со 2015 година постигнато VW Passat GTE, чијашто ланска продажба е зголемена трипати. Но, и купувачите во премиум сегментот сé почесто се решаваат за хибридниот погон. Голем напредок имаат забележано Mercedes C 350 e, Volvo XC90 PHEV, BMW 330e, BMW 225xe Active Tourer и BMW X5 40e, коишто воедно се наоѓаат во водечката десетка во сегментот.
https://automedia.mk/objavi/27142
Кај возилата со електричен, односно батериски погон, предводи Renault Zoe со 21.337 примероци, пред „сестринскиот“ Nissan Leaf (18.557) и Tesla Model S со 12.353 примероци. Големи промени се случуваат и во овој потсегмент, за што сведочат драстичните осцилации во продажбата, во корист на новите генерации електрични автомобили, со продолжен досег и оптимирана конструкција. Во споредба со 2015 година, зголемена е продажбата на Zoe и Leaf, исто како и на BMW i3, Mercedes B 250 e, на сметка на Tesla Model S, Volkswagen e-Golf, Kia Soul EV и Volkswagen e-Up.
Продажба на електрични возила во Европа
| Место | Марка | Модел | Продажба 2016 | Удел | Продажба 2015 | |
| 1 | Renault | Zoe | 21337 | 10,2% | 18566 | |
| 2 | Nissan | Leaf | 18557 | 8,9% | 15345 | |
| 3 | Tesla | Model S | 12353 | 5,9% | 16643 | |
| 4 | BMW | i3 | 9726 | 4,6% | 6216 | |
| 5 | Volkswagen | e-Golf | 6666 | 3,2% | 11170 | |
| 6 | Kia | Soul EV | 4433 | 2,1% | 5812 | |
| 7 | Tesla | Model X | 3688 | 1,8% | 0 | |
| 8 | Mercedes | B250e | 3504 | 1,7% | 2795 | |
| 9 | Volkswagen | e-Up! | 2565 | 1,2% | 2976 | |
| 10 | Peugeot | iOn | 1893 | 0,9% | 1477 | |
| Останати | 6536 | 3,1% | 6762 |
Продажба на плагин-хибридни возила во Европа
| Место | Марка | Модел | Продажба 2016 | Удел | Продажба 2015 | |
| 1 | Mitsubishi | Outlander PHEV | 21328 | 10,2% | 31275 | |
| 2 | Volkswagen | Passat GTE | 13248 | 6,3% | 4819 | |
| 3 | Volkswagen | Golf GTE | 11351 | 5,4% | 17258 | |
| 4 | Mercedes | C350e | 10231 | 4,9% | 5858 | |
| 5 | Volvo | XC90 PHEV | 9586 | 4,6% | 2859 | |
| 6 | BMW | 330e | 8702 | 4,2% | 89 | |
| 7 | Audi | A3 e-Tron | 6894 | 3,3% | 12080 | |
| 8 | BMW | 225xe Active Tourer | 5915 | 2,8% | 266 | |
| 9 | BMW | X5 40e | 5393 | 2,6% | 1539 | |
| 10 | BMW | i3 Rex | 5322 | 2,5% | 5613 | |
| Останати | 20071 | 9,6% | 18920 |
Норвешка е најголем пазар за електрични и плагин-хибридни возила во Европа, со удел во вкупниот возен парк од 29% и 44.888 продадени примероци. Водечката тројка ја комплетираат Велика Британија (38.993) и Франција (29.205). Најголем пораст меѓу десетте најголеми пазари имаат забележано Белгија со 147%, Шведска (+54%), Австрија (+82%) и Шпанија (+60%).
Корисниците на електрични автомобили во Европа моментно имаат на располагање над 110.000 полначи за струја.
