Од крајот на следната година Mercedes поаѓа во лов на Porsche 911. Исто како со големиот брат SLS, новиот GT е дело на AMG. Но, и BMW треба да се загрижи.
Оваа марка вози под полна гас. Новиот GT, како замена за суперспортскиот SLS е најавен за крајот на 2014 и почетокот на 2015 година. Со долгата хауба и скусениот опаш, Mercedes GT покажува сличност со актуелниот SLS AMG, но за разлика од него ги нема скапите и комплицирани крилести врати. Во поглед на димензиите новакот ќе биде помал од SLS, но и значително полесен од него. Конструкцијата со носечка рамка од алуминиум останува непроменета, а Mercedes смета дека примената на карбон е прескапа и за овој автомобил.
Во поглед на погонот нема компромиси: Мотор во средина, менувач со двојна спојка, погон назад со активен диференцијал и распределба на тежината 50:50. Моторите ќе имаат шест или осум цилиндри, со моќност меѓу 350 и 500 КС. Веќе е потврдена и ограничена серија Black Series, со преку 550 КС.
Цената на оснoвниот модел ќе изнесува околу 100.000 евра, што е 90.000 евра помалку од актуелниот SLS AMG. Со тоа, GT ќе цели директно на Porsche 911 Carrera S и GT3. Новиот модел воедно ќе го загрозува и евентуалниот наследник на легендарниот M1 или на родстерот Z8. Се планира и родстер верзија со ознака GTC.
На Mercedes GT ќе му се придружат влезните модели во гамата на спортското одделение на марката од Штутгарт, А 45 AMG и CLA 45 AMG, кои со четирицилиндарците со турбонатполнење и 360 КС поаѓаат во лов на VW Golf R, BMW M 135i и Audi RS3.
До 2017 година, кога AMG ќе го одбележи 50-от роденден, спортската секција на Mercedes планира да ја зголеми продажбата на 30.000 возила годишно. Во оваа бројка ќе учествува и верзијата од AMG на Mercedes GLA, која што ќе доживее премиера на салонот во Франкфурт наесен.