Дарко Јаконов
По Smart и AMG SLS, третиот модел на Mercedes кој добива погон на струја е класата B. Америка ќе биде главен пазар за електричниот автомобил.
Изведбата на класата B со погон на струја доживеа премиера на салонот во Њујорк. Продажбата во САД почнува догодина, а подоцна моделот ќе биде достапен и во Европа. Во технички поглед, изведбата Electric Drive од класата B е иста со студијата од последниот салон во Париз. За погонот се грижи електромотор со 136 КС, кој возилото го забрзува до темпо 100 за помалку од 10 секунди. Крајната брзина е ограничена на 160 km/h, заради штедење на батериите.
Литиум јонските батерии се вградени во подот и во идеален случај дозволуваат класата B со погон на струја да вози до 200 километри со едно полнење. За два часа се постигнува 50-процентна наполнетост на батериите на американската струјна мрежа. Во изгледот нема разлики во споредба со стандардните модели. Цената на возилото ќе биде позната непосредно пред стартот на продажбата.
