Дарко Јаконов
Помалку е повеќе. Токму според тоа мото се раководеа во Lotus при создавањето на новиот 3-Eleven. Тука нема простор за компромиси, сé што е вишок мора да се отстрани од возилото.
Одделението за мотоспорт на Lotus го претстави новиот 3-Eleven на „Фестивалот на брзината во Гудвуд“ во тркачка верзија за 135.000 евра и во улична верзија за 20.000 евра помалку. Екстралесниот родстер со драматичен дизајн е најскапиот и најбрз уличен модел на Lotus откако Колин Чепмен (1928-1982), легендарен конструктор во формула 1, ја основаше фирмата во 1952 година. Неговото кредо „помалку е повеќе“ остана јадро на марката специјализирана за бескомпромисни спортски автомобили.
[quote_box_left]За еден спортски автомобил да стане подобар, тој мора да биде само побрз и полесен. Новиот Lotus 3-Eleven ја носи оваа филозофија на ново ниво – и ги декласира многу поскапите конкуренти – Жан Марк Гале[/quote_box_left]
„Стандардната опрема“ во 3-Eleven е посветена само на задоволството во возењето: Управливост прецизна како жилет и блокада на диференцијал во замена на амортизери што обезбедуваат комфор за патниците, лесна конструкција место клима уред и електронски системи што му помагаат на возачот, како и одговорна будност на возачот во замена за сеопфатна покриеност со воздушни перници. Единствено што мораше да остане во возилото се АВЅ и контрола на тракцијата.
Лесната каросерија од композитни материјали е поставена врз алуминиумска шасија, а во средината на возилото работи 3,5-литарски V6 со механички компресор и 456 КС. Сето тоа се сервира во комбинација со тежина помала од 900 килограми. Спринтот до сто трае помалку од три секунди, а забрзувањето не престанува до 290 километри на час. За негативно забрзување се грижат тркачки сопирачки дискови со четириклипни клешти и пречник од 332 милиметри.
Производството во мануфактура ќе стартува во февруари 2016 во седиштето на фирмата во Хетел, Британија. Како што наведува и името, серијата ќе се произведе во само 311 примероци. Цената на уличната верзија изнесува 115.000 евра, додека тркачката верзија чини 135.000 евра – од фабрика.
