Дарко Јаконов
Престижната марка на Toyota ќе го претстави наследникот на купето IS на салонот во Токио во ноември. Новото купе ќе ја носи моделската ознака RC и со дизајнот се ориентира според концептот LF-CC.
Продажбата на Lexus RC на американскиот пазар, како примарен за марката, ќе стартува кон крајот на следната година. Основа за возилото е концептот LF-CC што марката го прикажа на салонот во Париз во минатата година, со техника од моделските серии IS и GS. Прототипите на новиот модел на Lexus во моментов се наоѓаат на завршно тестирање на германската патека Нирбургринг.
Моторот во купето RC ќе биде шестцилиндарец од 3,5 литри во V, односно истиот од лимузините IS и GS. Во Јапонија и во Европа ќе се нуди и хибридна верзија од моделот, но не и на пазарот во САД. На салонот во Детроит во јануари се очекува врвната моделска изведба RC-F, со осумцилиндарскиот мотор со 416 КС од актуелното купе IS-F.
