Новиот концептен автомобил на британскиот специјалист за теренци најавува дека идните модели на марката ќе имаат спортска ориентација во изгледот. Концептот е најава за идниот Freelander.
На салонот во Њујорк што почнува на 18-ти април ќе биде претставен концептниот автомобил Discovery Vision Concept, како најава за новата генерација на Land Rover Freelander. На фотографијата што Британците ја објавија денес се открива само детал од внатрешноста и груб нацрт од контурите на возилото, прикажан на дисплејот во средишната конзола. Но, и овој детал е доволен да се заклучи дека Land Rover размислува да користи голем дисплеј по целата површина на средишната конзола, во стил на Tesla Model S.
Големиот дисплеј, односно повеќе таблет отколку дисплеј, ги заменува класичните прекинувачи и команди во конзолата, овозможувајќи прегледен, флексибилен и модерен изглед на кокпитот. Таблетот е врамен со дебели хромирани лајсни, а во делот од конзолата меѓу седиштата се гледа препознатливиот контролер со ротирање и притискање, когошто го познаваме од компактниот Range Rover Evoque.
Во кабината на Land Rover Discovery Vision Concept има место за седуммина патници. Идниот сериски модел што ќе произлезе од концептот ќе го замени сегашниот Freelander. Класичната верзија со пет седишта ќе го носи името Discovery Sport, по пример на Range Rover Sport, додека седумседот со продолжено меѓуоскино растојание ќе се нуди како Discovery Grand.