Производителите на гуми не заостануваат во вештината да го привлечат вниманието на публиката преку концептни автомобили. Нивниот автомобил работи со двотактен дизел и секако вози со гуми Kumho.
Новата генерација автомобилски пневматици е само дел од експонатите што Kumho ги изложува на саемот за пневматици во германскиот Есен. Корејскиот производител разви и концептен автомобил, наречен Coop-Car 3 for free, кој е базиран врз претходната генерација на Kia Picanto и има една особеност под хаубата. Таму работи двотактен дизел, со три цилиндри и работна зафатнина од 0,9 литри. Со современа технологија за впрскување на горивото преку заеднички вод под висок притисок, Coop-Car троши само 2,5 литри дизел на сто километри.
Логично е тоа што возилото користи гуми од Kumho, во случајов KH27 Ecowing ES01, со оптимирана економичност. Покрај тоа што гумите имаат низок отпор при тркалање, тие се одликуваат и со ниска бучава, за што меѓу другото ги добија и највисоките оцени на тестот на гуми на клубот АДАК.
Shell и Bosch дел од проектот за повторно заживување на двотактните мотори
Партнери на Kumho во изработката на концентниот автомобил беа консултантската куќа TCU и Универзитетот за применети науки во Фридберг. Целта беше да се истражат предностите на двотактен мотор во модерен автомобил и истите да се искористат во комбинација со интелигентна контролна електроника за моторот, впрскување гориво, средства за подмачкување и гориво, во автомобил со најниски можни емисии на азотни оксиди, СО2 и бучава. Во проектот учествуваа и гигантите Shell и Bosch.
Името „3 for Free“ асоцира на DKW 3=6 од 1953 година, кој исто така поседуваше двотактен мотор со три цилиндри и според производителот работеше двапати поефикасно од споредлив четиритактен мотор, па оттаму и ознаката 3=6.
