Кинеското здружение на автомобилската индустрија ги повикува производителите и властите да се откажат од „лудилото со намалување на цените“. Оттаму порачуваат дека само на тој начин може да се обезбеди стабилен развој на индустријата.
„Ценовната војна не е долготрајно решение“, пишуваат од Кинеското здружение на производители на автомобили, во објавата што е споделена на нивниот профил на WeChat.
Производителите на автомобили треба повеќе да се посветат на технологијата и на развојот на марките, а исто и локалните власти треба да користат „соодветни методи“ во промовирањето и стабилизацијата на економијата, додаваат од Здружението.
Повеќе од 40 автомобилски марки што нудат електрични модели или модели со обичен погон во Кина, понудија агресивни попусти со цел да ја поттикнат својата продажба. Tesla прва го повлече тој потег, што понатаму прерасна во ценовна војна за освојување колку е можно поголем дел од пазарот.
Локалните власти исто така им нудеа субвенции на купувачите, со цел да ја поттикнат продажбата. Во дел од тие програми се вклучија и производителите на автомобили, за да ја охрабрат индустријата.
Автомобилската индустрија и нејзиниот долг синџир добавувачи е столб на кинеската економија, со голем придонес во собирањето данок и во вработувањето.