за

JEEP CHEROKEE: ДОБРИОТ, ЛОШИОТ И …ЗАОБЛЕНИОТ

Додека кај стариот Cherokee дизајнот беше подреден на теренските можности, кај новиот модел, кој е воедно и наследник на моделот Liberty, во преден план доаѓа токму дизајнот.

Сличностите со стариот модел, со код XJ, се повеќе од очигледни. Всушност ова е толку некарактеристичен Jeep што ако ја немаше решеткастата предна маска би можело да се помисли дека станува збор за нов модел од некој сосема друг бренд на возило. На пример нов Pontiac Aztek?! Се претпоставуваше дека кога тогаш ќе дојде крајот за предимензионираните предни светла, но американскава интерпретација дојде некако наеднаш. Или сепак не.

Новиот Индијанец е предводник на нов и храбар дизајн. За американската дизајнерска школа ова е секако добредојден бран свежина. Очигледно целната група на потенцијални купувачи била на врвот од пиедесталот на цели при креирањето на овој модел. Иако донатор на платформата е заносната Giulietta, Jeep гордо изјавува дека дизајнот е 100% американски. Во техничкиот дел се очекуваше ваков потфат по превземањето на Chrysler и Jeep од страна на Fiat. Се чини дека здружувањето и користењето на одредени механички компоненти е единствен начин за опстанок во ова сурово време. На крајот, и не е толку важно кое чие е, се додека ја врши намената беспрекорно и одговара на концептот на возилото.

Новиот Cherokee секако е, во најмала рака, впечатливо возило и ни останува да се стрпиме додека ја преплива големата бара за да се убедиме во тврдењата од неговите креатори дека се работи за уште повозлив, поиздржлив, со поголема висина од подлогата, побрз и поштедлив Cherokee од било кога. Дека е технички навистина напреден сведочи и автоматскиот 8 степен менувач кој за првпат се користи кај Jeep. Дизајнот е секако прашање на вкус и можно е да има полемики, но околу теренските можности Jeep има премногу искуство и знаење за воопшто да се посомневаме.

[nggallery id=5]

Напишано од Дарко Јаконов

Објавува текстови за автомобилизам од 1994 година, дел од оригиналната постава на магазинот Ауто Плус на Томислав Биљарац, главен уредник на првото лиценцирано издание на Ауто Билд Македонија, член на жирито за избор на европски автомобил на годината Ауто 1 на групацијата магазини Ауто Билд, во 2013 година ја основа Аутомедиа.

One Comment

Одговори

Напишете коментар

Вашата адреса за е-пошта нема да биде објавена.

Citroen C4 Picasso: Пикасо ќе го нацрташе исто

SUBARU WRX: Фината механика доби лице