Дарко Јаконов
Компактот на Alfa Romeo доби почесно одликување за дизајн на 23-от „Златен Компас АДИ“, најпрестижниот и најстар избор од овој вид во Европа.
Асоцијацијата за индустриски дизајн Златен Компас, најстара и најпрестижна манифестација за дизајн во Европа почесно ја одликуваше Alfa Romeo Giulietta на 23-то издание на изборот. Моделот досега има освоено повеќе од 20 награди од претставувањето во повеќе земји, почнувајќи од Италија и Германија, преку Грција и Франција, до Данска и Словенија. Неодамна Giulietta доживеа моделско освежување во кое што беа опфатени помали детали во дизајнот на каросеријата, темелна преработка на внатрешноста и воведување неколку нови мотори. Специјално за македонскиот пазар, Giulietta е достапна по цена од 18.690 евра во популарната верзија со дизел мотор 1.6 JTDM со 105 КС и ниво на опрема Progression.
Манифестацијата „Златен компас АДИ“ е воспоставена уште во 1954 година и моментно се одржува на секои три години. Престижната награда за индустриски дизајн е резултат на идејата на Џио Понти да се одбележат вредноста и квалитетот на производите со италијански дизајн. Во составот на жирито влегуваат експерти, дизајнери, критичари, историчари, специјализирани новинари и членови на АДИ, кои во континуитет ги следат збиднувањата на сцената на дизајнот и ги избираат најдобрите производи.
