Ducati ќе го претстави новиот 1299 Panigale на салонот на мотоцикли во Милано. Со 205 КС, овој мотор од 1,3 литар е најсилен двоцилиндарец на сите времиња.
Покрај стандардната варијанта Ducati 1299 Panigale ќе биде претставена и облагородената верзија S на новиот Panigale. Двоцилиндарскиот мотор на новиот Ducati 1299 Panigale ослободува 205 КС при 10.500 вртежи, што е апсолутен рекорд кај сериските мотоцикли. Како максимален вртежен момент се наведува вредност од 145 Nm при 8.750 вртежи.
Италијанците ги дотераа и дизајнот на задниот дел, предниот оклоп и седиштето. Со промените во предната и задната вилушка е подобрено и подвозјето на Ducati 1299 Panigale. Новиот АВЅ којшто е веќе познат од KTM Adventure 1190 и потекнува од Bosch, исто така се вградува во новиот Panigale. Контролата на тракцијата и таканаречената контрола Ducati-Wheelie може да се дотераат во осум различни степени. Со полн резервоар, Panigale тежи 191 килограми. Малку полесен е Panigale 1199 со тежина од 188 килограми со полн резервоар.
Верзијата S на Ducati 1299 Panigale поседува полуактивно подвозје развиено во соработка со Öhlins, коешто ја подобрува амортизацијата на овој суперспортски модел. Заедно со Ducati 1299 Panigale, Италијанците ќе ја претстават и новата верзија на Ducati 1199 Panigale R, којашто се базира на Superleggera и во сериската верзија располага со 205 КС при 11.500 вртежи. Во понудата останува и Ducati 899 Panigale во „дукати црвена“ и „арктички бела“ боја.
