Нов член во семејството на BMW M GmbH. Компактниот теренец X3 првпат се појавува во М-верзија, заедно со купе варијантата X4.
Најсилниот шестцилиндарец во историјата на BMW работи под хаубата на X3 M и купе-теренецот X4 M. Трилитарскиот твинтурбо распоплага со моќност од 480 КС и вртежен момент од 600 њутнметри. Како што е ред во последниов период, веднаш е достапна и уште посилна изведба Competition, кадешто следуваат уште 30 КС, односно моќноста се искачува на 510 КС.
Осумстепен автоматик ја пренесува моќта до погонот на сите тркала M xDrive, кој имаше премиера во BMW M5. Погонот става нагласок на задната оска и работи во комбинација со активен диференцијал назад. Спринтот до темпо сто трае 4,2 секунди, односно една десетинка покусо во верзијата Competition.
Каросеријата е зајакната, а подвозјето е дотерано соодветно за екстремната моќност. Возачот може да избира меѓу три режими на електронски регулираните амортизери. Управувањето работи со променлив преносен однос. Целината ја комплетираат сопирачки со спортски перформанси и бандажи од 20 инчи.
При избор на динамичен модус на погонската спрега се дозволува дозирано пролизгување на тркалата. Вештите, или само храбри возачи, можат и целосно да ја исклучат контролата на стабилноста. Два различни сетапи можат да се меморираат, за да се вклучат по потреба и желба, преку двете М-копчиња на воланот.
Промените во надворешниот изглед и во кабината се вообичаени за M GmbH. Секако дека верзиите Competition од BMW X3 M и X4 M одат чекор подалеку во ставањето посебен печат во спортскиот стил. Бандажите имаат пречник од 21 инч, полирани и во црна боја. Кој сака уште поекстремно и попрепознатливо, може да посегне по компоненти од карбон.
Цената на BMW X3 M за германскиот пазар изнесува 84.900 евра, додека за варијантата Competition треба да се доплати 8.500 евра. Купе-изведбата BMW X4 M чини 87.100 евра, односно 95.600 евра како Competition.
Електричниот BMW iNext на екстремно тестирање во Поларниот круг
Револуциите почнуваат луксузно: Хибриден BMW 745е со 58 km на струја
Да не се шегуваме, новата серија 7 на BMW им се допаѓа на Кинезите
Хибриден BMW 330e како посебна гордост на баварците