Дарко Јаконов
Нова причина за прославување во фабриката на BMW во Динголфинг, произведен е двомилионитиот примерок од Серијата 7. Секако дека примерокот на којшто му припаѓа оваа чест е електричната изведба i7.
Додека во саботата се одржуваше свеченост за претставување на новата Серија 7 на македонската сцена, преку електричната изведба i7, во Динголфинг, баварски град на стотина километри оддалеченост од Минхен, се подготвуваше за испорака двомилионитиот примерок од најголемата лимузина на BMW.
Славеничкиот примерок е BMW i7 xDrive60, во карбон црна боја, со внатрешност во боја на коњак, изработена од веганската замена за кожа, што Баварците ја нарекоа Веганца.
Серијата 7 и фабриката во Динголфинг имаа причина за заедничка прослава, по повод почетокот на продажбата на седмата генерација од серијата 7 на BMW. Директорот на фабриката, Кристоф Шредер, вели: „Серијата 7 на BMW е нашиот врвен модел. Во него ги соединуваме прогресивниот луксуз и најновите технологии.“ Директорот со звучно презиме од политичката сцена е посебно горд на тоа што моделот „се произведува тука уште од неговото воведување во понудата пред 45 години.“
Првата серија 7 на BMW се појави во 1977 година. Моделот оттогаш се произведува во Динголфинг. Во фабриката на заедничка лента се произведуваат сите три погонски варијанти на „зибенер“, на „седумката“. Освен со бензински и дизел мотор, BMW од серијата 7 се нуди првпат и во чисто електрична изведба i7. Секако дека гамата опфаќа и изведби со приклучен хибриден погон.
Еден податок што се однесува за домашниот пазар: Бидејќи е-компонентите потекнуваат од ЕУ, царината е 0%, место 5% доколку деловите се произведени, на пример, во Кина
Електромоторите и високоволтните батерии за BMW i7 се произведуваат локално во Динголфинг. Тие се испорачуваат од блискиот центар којшто е специјализиран за производство на компоненти за електричен погон.
BMW има вложено повеќе од 300 милиони евра во производството на новата Серија 7 во Долна Баварија.
Посебен спектакл е тоа што завршените примероци од лимузината, по напуштањето на производствената лента се движат целосно автопилотирани до подрачјето за финална доработка и проверка. Возилото се води со помош на сензори што се поставени покрај лентата. Исто и управувањето го презема надворешен софтвер. На овој начин значително се подобрува ефикасноста на логистиката.
„Технолошките носители, како серијата 7, се катализатори на пресвртницата – исто и за нашите фабрики,“ објасни директорот за производство на ниво на групација BMW, Милан Недељковиќ, кога почна производството на новата серија во јули годинава.
Наскоро следи целосен видео материјал од BMW i7 и BMW XM во салонот на М Кар.
