Глобалната алијанса за батерии, којашто е иницијатива на Светскиот економски форум, заедно со консултантската компанија McKinsey, предвидуваат силен раст во побарувачката за батерии до 2030 година. Тоа соодветно ќе влијае врз новите вработувања и врз економскиот раст.
Побарувачката за батерии ќе расте за околу 25 проценти годишно до крајот на следната декада. Тоа го предвидуваат експертите на кунсултантската компанија McKinsey и Глобалната алијанса за батерии на Светскиот економски форум.
Според истражувањата, побарувачката за батерии до 2030 година ќе порасне најмалку 14 пати. Во оптимистичкото сценарио на аналитичарите и познавачите се наведува дури 19-кратно зголемување. Понатаму се зема предвид дека ќе се користат усовршени батерии, ќе се рециклира поголем удел од суровините, батериите ќе се користат двапати и одреден број електрични автомобили ќе ја предаваат енергијата во своите батерии во дистрибутивната мрежа.
Главниот носител на растежот доаѓа од електричната мобилност. Аналитичарите предвидуваат продажбата да бележи раст од 30% годишно. Побарувачката за батерии во светски рамки ќе надмине 3.500 GWh. За споредба, во 2018 година, светската побарувачка изнесуваше само 184 GWh.
Според предвидувањата, синџирот за одржливо производство на батерии ќе вработува околу 10 милиони лица и ќе создава дополнителна вредност во висина од 150 милијарди долари
На сообраќајот отпаѓаат девет десетини од побарувачката на батерии (3.400 GWh). По региони, најголем потрошувач е Кина (1.400 GWh), пред Европа (570 GWh) и САД (540 Gwh). Батериите воедно ќе придонесат со 30% во неопходното намалување на штетната емисија во секторите сообраќај и енергија во светски рамки.