Дарко Јаконов
BMW M4 уште во дебитантската година победи во германскиот шампионат на кружни патеки. Минхен ја прославува победата со специјална серија од М4, ограничена на само 23 примероци.
Љубителите на специјалните серии на модели за неколку години ќе се радуваат да обезбедат примерок од оваа серија на BMW M4, изработена во чест на победата на BMW M4 и Марко Витман во германскиот шампионат на кружни патеки. Серијата е ограничена на 23 примероци, според стартниот број на Витман, се испорачува исклучиво во снежно бела боја, повторно според бојата на тркачкиот автомобил во шампионатот. Сите посебни детали на M4 DTM Champion Edition се изработени рачно во специјализираната работилница на BMW Individual Makufaktur во Гархинг, во близина на Минхен. Мат црната хауба и задниот капак со впечатливи ленти се во склад со покривот од карбон, а отстрана има посебна лента во црна боја. „Бубрезите“ се обрабени во портокалова боја, зад предните тркала е поставено логото на M GmbH, на вратите е стартниот број на Витман, а на задните прозорци се поставени германското знаме и натписите „WIT“ и „DTM Champion 2014“. Цената на ексклузивниот модел уште не се објавува, но секако и таа ќе биде ексклузивна.
