Благородната британска марка со вишок коњски сили повторно организира возење на нејзините модели на замрзната подлога – без брзински и без просторни ограничувања.
Aston Martin и во претстојниот февруари ќе им понуди можност на своите авантуристички расположени возачи да ги искусат перформансите и на моделите на марката во една од најсуровите и најтешки природни средини во САД. По премиерата во минатиот февруари, Британците најавуваат враќање во автентичниот „западњачки“ град Крестед Бати, во срцето на Карпестите планини во Колорадо, во втората сезона на возења полни со возбуда и луксузен животен стил.
Сопствениците на Aston Martin што ќе се „квалификуваат“ за учество во програмата ќе возат три дена на тест полигон со површина од 4 хектари, за чијашто подготовка е ангажиран тим од 250 лица. Експерти на Aston Martin веќе неколку недели работат на подготовка на „патеките“ за слалом, за лизгање, совладување свијоци и владеење со сопирачките во услови на возење на мраз. По совладувањето на техниките за возење во овие услови, учесниците ќе можат да се „пуштат“ по замрзнатата патека долга повеќе милји.
„Aston Martin On Ice“ е само еден од настаните што марката ги организира за своите возачи. Во февруари 2015 ќе се вози на мраз и во Лапонија, на патека се вози во Спа Франкоршамп, Аскари, Филип Ајленд, Таупо (Нов Зеланд), се возат и тури по Алпите, во француските вински региони … условот за учество е сепак да се поседува Aston Martin.