Дарко Јаконов
Инженер на Ford разви робот којшто е доволно компактен да го собере во коритото за резервно тркало и способен е да ги заврши тешките транспортни задачи место возачот. Ford Carr-E уште е прототип, но постои добро расположение роботот навистина да се појави на пазарот.
Инженерот на Ford, Килијан Вас, во рамките на интерниот идеен натпревар во компанијата го разви роботот Carr-E, како помош за превоз на тежок товар. Роботот има исти димензии како обичен бандаж, што значи дека може да го собере во коритото за резервно тркало, а тежината му изнесува десет килограми.
По полчасовно полнење на батериите, двата електромотора можат да го движат роботот до растојание од 15 километри, со брзина до 20 km/h. Carr-E може да носи товар до 130 килограми. Освен за превоз на товар, роботот може да се користи и за личен превоз, при што брзината и правецот се одредуваат преку преместување на тежиштето на телото. Доколку се користи за превоз на товар, Carr-E се управува далечински преку мобилна апликација или во автоматски модус. Во последниов случај, роботот едноставно го следи сопственикот, односно неговиот паметен телефон на одредено растојание.
Уредот ја скенира средината преку сензори за паркирање, какви што се вградуваат во автомобилите. Пронаоѓачот вградил и заштита од кражба, со тоа што сензорите за тежина го активираат алармот. Уредот уште е во развојна фаза, но во Ford се размислува дали Carr-E би можело да се пушти во сериско производство.
