Honda објави нови детали и нови фотографии од топ-моделот во гамата на Civic, пред неговото конечно претставување на салонот во Женева. Сосема сигурно, Type R ќе биде најбрз во класата.
Супериорна аеродинамика и дволитарец со тубонатполнење и директно впрскување, чијашто точна моќност и натаму останува непозната, ќе се погрижат новиот Honda Civic Type R да ја понесе титулата на најбрз модел со преден погон во компакт класата, со крајна брзина од 270 km/h. Тоа е новиот податок што го објавуваат од Honda пред премиерата во Женева, а веќе се знае и бојата на автомобилот на штандот, „шампионски бела“.
Подот на најбрзиот Civic е речиси целосно рамен и „соработува“ со задниот дифузор, заради постигнување оптимална потисна сила, којашто буквално го лепи автомобилот на асфалтот. Големиот заден спојлер исто така придонесува за потисокот, додека предниот сплитер и длабоките странични прагови го контролираат струењето на воздухот и го намалуваат подигнувањето на носот. Предниот браник е специјално изведен за спречување на турбуленцијата околу предните тркала, смалувајќи го отпорот на воздух и воедно придонесувајќи за повисока стабилност при високи брзини.
Спортските сопирачки носат печат на Brembo на предната оска и конструирани се посебно за Type R. Предните дискови имаат пречник од 350 милиметри и ги „гризаат“ четириклипни сопирачки клешти. Бандажите од 19 инчи имаат ексклузивен дизајн за најбрзиот и најмоќниот сериски Type R досега. Одведувањето на топлината исто така било голем предизвик за конструкторите. Предниот браник има поголема горна и долна маска во споредба со стандардниот Civic, како и канали за проветрување во долниот дел од предните крила.
Премиерата на Honda Civic Type R е на 3-ти март во Женева.