Kia ќе ја претстави четвртата генерација на Rio кон крајот на септември, на салонот во Париз. Првите објавени скици најавуваат дека Rio и натаму ќе се издвојува со динамичната појава. Студија од три континенти учествуваа во создавањето на дизајнот.
На салонот на автомобили во Париз, на 29-ти септември, Kia ќе ја претстави четвртата генерација на Rio, на светскиот бестселер на марката. Првите официјални скици од производителот најавуваат модел со моќен настап од сегментот B, со јасни, допадниви линии и со со нов, самостоен карактер. Во споредба со претходникот се продолжени предниот каросериски превис, хаубата и меѓуоскиното растојание. Тоа придонесува за самоувереност во појавата на новиот Rio, исто како и релативно исправените задни столбови.
Во создавањето на новиот дизајн на каросеријата и на внатрешноста учествуваа дизајнерските центри на Kia во Франкфурт и во Ирвајн (Калифорнија), во тесна соработка со главниот центар на марката во корејскиот Намјанг.
Само лани во светот се продадоа 473.000 примероци од актуелниот модел од третата генерација. Новиот Rio ќе се надоврзе на одличните продажни успеси на претходникот со практичност, нови системи за безбедност и поврзување и користење на преносни уреди и услуги. Техничарите ветуваат и уште подобра управливост.
Моделот за европскиот пазар ќе стартува со производство кон крајот на годинава, а потоа ќе следат и моделските изведби за останатите пазари.
