Европа има над половина милион електрични возила по патиштата

За близу една третина е зголемена продажбата на електрични и плагин-хибридни возила во првите пет месеци од годинава на европскиот пазар. Продажбата моментно ја предводат хибридите со штекер.

Според последната бројна состојба, по европските патишта моментно циркулираат над половина милион возила, вклучувајќи патнички автомобили, доставни возила, автобуси и квадрицикли. Во оваа статистика секако дека преовладуваат патничките автомобили, со 458.000 регистрирани примероци. Доколку продолжи тековнава динамика, бројот на патнички автомобили со електричен погон и плагин-хибриден погон ќе надмине половина милион примероци веќе во август годинава.

На европскиот пазар во мај се продадени 13.111 патнички автомобили со електричен погон –  вклучувајќи ги плагин-хибридите коишто се вбројуваат во истата категорија со возилата со „батериски“ погон. Тоа е за 16 проценти помалку во споредба со април годинава, но за 1 процент над мајската продажба лани. Причината за оваа куса стагнација во продажбата е германскиот пазар, кадешто купувачите го чекаат стартот на субвенционираната продажба на електрични автомобили.

Претходи уште порапиден раст во продажбата – купувачите чекаат да се појават новите моделски верзии со зголемен досег, додека на германскиот пазар се очекува стартот на субвенциите

Плагин-хибридите, како Mitsubishi Outlander PHEV, со 7.523 продадени примероци во мај го презедоа водството пред автомобилите со чисто електричен погон, со продадени 5.588 примероци. Лани беше поинаква ситуацијата, кога 53 проценти од продажбата отпаѓаа на чисто електрични возила. Објаснувањето за оваа пресвртница: Купувачите чекаат марките да стартуваат со продажба на новите моделски верзии со зголемен досег.

Mitsubishi Outlander PHEV цврсто ја држи првата позиција кај плагин-хибридите

Најпродаван електричен автомобил со „батериски“ погон во мај е Renault Zoe, со 1.650 примероци. По него следат плагин-хибридот Mitsubishi Outlander PHEV со 1.581 примероци и електричниот Nissan Leaf со 1.165 продадени примероци. Не е за занемарување и бројката од 1.530 продажби што на Renault му ја има донесено електричната верзија на Кangoo, во сегментот на доставните возила. На второто место следи доставниот e-NV200 на партнерот Nissan со 783 продадени примероци во првите пет месеци од годинава, додека трет е Peugeot со 296 примероци од Partner EV.

Паралелно се шири и мрежата од полначи. На територијата на цела Европа моментно се поставени над 80.000 полначи за електрични возила, од кои 9.418 се брзи полначи, на коишто е-автомобилите можат да обноват до околу 80 проценти од капацитетот на батериите за само половина час.

Продажба на чисто електрични возила од јануари до мај

Продажба на плагин-хибридни возила од јануари до мај