Дарко Јаконов
Британската спортска легенда Бредли Вигинс извозе 54,5 километри за време од еден час со велосипедот во чијшто развој учествуваше Jaguar, поставувајќи нов светски рекорд.
Разлика во брзина од 1,5 километар на час се чини безначајна, но кога станува збор за возило на ножен погон, тоа е сосема доволно да се постави нов светски рекорд за едночасовна велосипедска трка со хронометарот. Британскиот велосипедист Бредли Вигинс го постави рекордот со извозени 54,526 километри за еден час на Pinarello Bolide HR, развиен во соработка меѓу Jaguar и реномираниот италијански производител на велосипеди Pinarello. Инженерите на Jaguar ги користеа за велосипедот истите дизајнерски методи како во моделот XE, којшто е најаеродинамичниот модел во историјата на марката со дивата мачка. На тој начин се намали отпорот на воздух на велосипедот за 7,5 проценти.
Меѓу иновациите во рекордерскиот велосипед на Вигинс спаѓа и едноделниот волан со посебно изведени потпирачи за рацете, заради намалување на отпорот на воздух. Инженерите на Jaguar и Pinarello интервенираа со истата цел и во дизајнот на предната вилушка, стеснувајќи ја истата и доближувајќи ја кон предното диск тркало, исто како и во дизајнот на запчениците и во осовините на тркалата.
