Што треба да содржи патната апотека?

Според Светската здравствена организација, 40 проценти од туристите поаѓаат на патување неподготвени. Ова е најосновното што треба да го содржи патната апотека.

Прво и основно што треба да се понесе се нараквици за еднократна употреба, пинцета, ножици, средство за дезинфекција на рани, фластер и компреси, еластични завои и термометар. Лекарства против бол, температура, дијареа, запек и настинка исто така се безусловно потребни. Специјални спрејови за нос, за изедначување на разликата во притисоците, односно против создавање притисок во ушите, се од голема помош пред и за време на патувањето. Против мачнина при патување помагаат специјални гуми за жвакање или акупресурни ленти.

Тие што патуваат подалеку треба да се подготват потемелно. Таблети за дезинфекција на вода, средства против мачнина во стомакот и за заштита од инсекти можат да бидат од голема корист. Во некои земји треба да се понесат и стерилни еднократни шприцови и игли. Покрај тоа, лекарствата треба да бидат заштитени од пробив на вода и од висока температура. Упатствата за употреба не треба да се оставаат, затоа што лекарот или апотекарот може од нив да извлече важни информации – без разлика што тие се на друг јазик.

При патување во подрачја со слаба медицинска нега се препорачува шест недели пред патувањето да се консултира лекар што е искусен околу патувањата во тропските подрачја и тој да препорача што треба да содржи патната апотека, како и да даде совети за потребните вакцинации и за однесувањето во средината.

Ако лекарства се примаат редовно, како резерва треба да се земе половина повеќе од потребната количина. Заради безбедност, при патување со авион, овие лекарства треба да се носат во рачниот багаж. Некои препарати се проблематични на граница. Шприц за инсулин во некои случаи може да претставува основа за сомневање за поседување дрога. Затоа е потребна лекарска потврда, на повеќе јазици.

Долгите патувања со автомобил или авион не се безопасни за луѓето со проблеми со вените. Олгото седење без пауза за движење може да предизвика згрутчување на крвта и зачепување на поголемите жили. Затоа треба да се носат посебни чорапи, односно медицински чорапи за тромбоза.