за

Тракс Макс • Трендот на малечките теренци

Производителите ги смалија теренците за уште еден број. Тоа е тренд што ниту еден производител не смее да си дозволи да го пропушти. Купувачите добиваат поевтин и поштедлив теренец.

Интересна е човечката природа. Секогаш бара нешто ново. Очите се ненаситни и просто се хранат со нови слики. А нив ги има многу во ова време на лесна достапност на информации потпомогнати со неизбежните маркетинг десанти. Што е тоа што го одредува изборот кај човекот? Зошто ни се допаѓа едно, а не ни се допаѓа друго? Фала му на Бога што сме сите различни и посебни, па така и производителите на автомобили се обидуваат да ни ги задоволат различните потреби.

При купување на возило, потребата не е единственото што го одредува изборот. Тука е и срцето кое знае да го прерипа разумот и да се реши за нешто повозбудливо и ирационално. Како инаку да се објасни постоењето на толку различни модели по смисол и цена, во релативно нова класа. Автомобилските производители го демнат секое слободно ќоше во меѓукласниот простор и го пополнуваат со цел можност за дополнителна заработка.

Станува збор за класата во која што веќе долго возат Yeti & Co. Класата се нарекува Mini-SUV или Mini-Crossover. Целта е да се добие корисно возило кое покрај имиџот на мини теренско возило ќе ја има и употребливоста. А намената е управување во градски услови на возење што вклучува, покрај асфалтна подлога, по некоја дупка од шахта или релативно лош пат, како и задолжителното качување на тротоари. Ова подразбира подигнато подвозје во однос на регуларните компакти и кратки каросериски превиси напред и назад. Кај некои од овие мали големци се нуди и вистински погон на сите тркала, како кај големите! Skoda Yeti, Dacia Duster, Nissan Juke, Chevrolet Trax, Opel Mokka, Toyota Urban Cruiser, Suzuki SX4 и Mini Countryman го нудат погонот на сите тркала како опција, а од друга страна моделите во доаѓање, како Peugeot 2008, Renault Captur и Ford EcoSport сакаат да поминат само со погон на една од оските. Шареноликоста оди и до таму што агрегатите кои се во понуда одат од 3 цилиндри и зафатнина од 898 cm³ кај Captur, па се до 1968 cm³ кај Yeti, а кога се работи за моќноста опсегот се движи од 82 КС кај Peugeot 2008 па сé до 211 КС кај John Cooper Works Coutryman. Ова само го покажува различниот пристап и замислата на производителите.

Каков е профилот на возилата и што ги поврзува купувачите со нивните возила?

  • Skoda Yeti – Сериозен со притаен авантуристички дух, практичар без претерана желба за експонирање
  • Dacia Duster – Практичар, практичар, практичар
  • Nissan Juke – „Не ме интересира многу за сопатниците ама сакам да уживам во стилот и возните својства кои ги нуди возилото“
  • Chevrolet Trax – „Сакам и стил и практичност и да не претеруваме со цената“
  • Opel Мокка – Прочитај погоре (Traxx), плус традиција и повисока цена
  • Toyota Urban Cruiser – „Toyota е нели?“
  • Suzuki SX4 – „Не се грижам што мислат другите, битно ми е да уживам во истрајноста и возните својства“
  • Mini Countryman – „Затоа што ми се може, а и фантастично вози и изгледа“
  • Peugeot 2008 – „Живеам во градот и не ми се напушта асфалтот, OK?!“
  • Renault Captur – funky, funky, funky…;
  • Ford EcoSport – Не е баш Kuga ама е сличен.

Секако дека за изборот решава и цената. И во тој поглед владее широк спектар. Цените одат од 9.240 € за Duster со преден погон, без клима, до повеќе од 30,000 € за Countryman со сé што може да се посака од опрема. Изборот е огромен и човек ќе се најде на слатки маки доколку се реши за возило од оваа класа. Но, едно треба да се запомни: Разликата од 5-10% во цената меѓу два модела не смее да биде решавачки фактор за вашата одлука. Прво се поаѓа од потребите, од намената, условите на користење, но не смее да се изостават и емоциите. Сепак не се купува возило секој ден.

Кол Рејсовски

[nggallery id=59]

Напишано од Дарко Јаконов

Објавува текстови за автомобилизам од 1994 година, дел од оригиналната постава на магазинот Ауто Плус на Томислав Биљарац, главен уредник на првото лиценцирано издание на Ауто Билд Македонија, член на жирито за избор на европски автомобил на годината Ауто 1 на групацијата магазини Ауто Билд, во 2013 година ја основа Аутомедиа.

Напишете коментар

Вашата адреса за е-пошта нема да биде објавена.

Alfa Romeo лансираше специјална серија на Giulietta

Студија: Издувните гасови ги зачепуваат артериите