за

Се враќа комбито во гамата на Honda Civic

Американците ја сакаат лимузината, на Јапонците им е доволна комбилимузината. Затоа досега отсуствуваше комбито во гамата на Civic. Сега ќе се усреќат и Европејците, по 20 години се враќа комбито.

Секој втор автомобил во класата на Golf е комби. Секој производител што очекува зголемување на продажбата не смее да се откаже од практичната каросериска изведба. Honda го прифати овој факт и по дваесет години повторно нуди комби од моделот од компакт класата. Комбито на Civic се води како Tourer и ќе доживее премиера на салонот во Франкфурт, а продажбата ќе стартува догодина.

Civic Tourer е дело на развојниот тим во германскиот Офенбах, а ќе се произведува во англискиот Свиндон
Civic Tourer е дело на развојниот тим во германскиот Офенбах, а ќе се произведува во англискиот Свиндон

Поради тоа што на американскиот пазар се бара само лимузината, а Јапонците ја возат комбилимузината најчесто во спортската изведба Type-R, комбито како каросериска форма што ја преферираат само Европејците остана занемарена во моделската понуда на Honda. Пропустот се поправи и јапонската марка комплетно ја разви комби изведбата во Европа и за Европа. Дизајнот, конструирањето, дотерувањето на подвозјето, сето тоа е дело на фабриката на Honda во англискиот Свиндон и на развојниот центар во германскиот Офенбах, без каква било интервенција од јапонските колеги.

Каросеријата е се уште маскирана при последните дотерувања на подвозјето според европскиот стил на возење
Каросеријата е се уште маскирана при последните дотерувања на подвозјето според европскиот стил на возење

За Tourer да се дотера според европскиот вкус и според европскиот стил на возење, инженерите се решија за многу потемелен зафат од обично продолжување на опашот. За прв пат во Honda Civic се вградува приспособлива амортизација за задната оска, со цел возилото да се однесува примерно при секој товар и за секоја примена. На тој начин се постигнуваат максимална стабилност и комфор при различни степени на натовареност, а возачот може дополнително да избира дали амортизацијата ќе му работи стегнато или комфорно.

[one_half]

За прв пат Civic ќе има приспособлива амортизација
За прв пат Civic ќе има приспособлива амортизација

[/one_half]
[one_half_last]

Три програми на избор: Динамична, нормална, комфорна амортизација
Три програми на избор: Динамична, нормална, комфорна амортизација

[/one_half_last]

Во пакетот на технички модификации на Civic спаѓа и соодветно дотерување на управувањето. Под хаубата ќе работат моторите од актуелните модели, односно бензинци од 1,4 и 2,0 литри со 100 и 142 КС, и два дизела, новиот од 1,6 литар со 110 КС и 2,2-литарецот со 150 КС.

Опашот на возилото е продолжен за 25 сантиметри. Со тоа се доби багажник со зафатнина од 600 литри и впечатливо низок товарен раб, како и повеќе простор за глава за патниците на задната клупа. Кога „волшебните седишта“ ќе се впуштат во подот, кабината на Tourer ќе понуди простор за товар од неверојатни два метри кубни. Задната клупа дополнително нуди можност да се исправи и во просторот меѓу неа и предните седишта да се смести велосипед, на пример.

Јапонците го најавија комбито во гамата на Civic со овој концептен автомобил
Јапонците го најавија комбито во гамата на Civic со овој концептен автомобил

Стратезите на марката очекуваат дека секој трет Civic произведен во фабриката во Свиндон, во Англија, ќе биде комбито Tourer. Во меѓувреме и некои други светски пазари пројавија интерес за комбито. Последен пат Јапонците ја понудија комби изведбата на Civic како Aerodeck, пред повеќе од дваесет години. Моделот и тогаш постигна одличен успех.

Напишано од Дарко Јаконов

Објавува текстови за автомобилизам од 1994 година, дел од оригиналната постава на магазинот Ауто Плус на Томислав Биљарац, главен уредник на првото лиценцирано издание на Ауто Билд Македонија, член на жирито за избор на европски автомобил на годината Ауто 1 на групацијата магазини Ауто Билд, во 2013 година ја основа Аутомедиа.

Напишете коментар

Вашата адреса за е-пошта нема да биде објавена.

Тест • Kia Rio 1.2 EX

105 години стар Rolls-Royce се врати во музеј по релито од 3.000 километри