Звучи како научна фантастика, но може да стане реалност уште денес. Самоуправувачки роботи ќе патролираат по улиците и ќе бараат ударни дупки во патот, за да ги пополнат користејќи 3D-печатарска техника.
Прототипот на фотографиите не изгледа особено уверливо, но замислата на неговите конструктори е генијална. Фирмата Addibot дојде на идеја да постави 3D-печатар на тркала и истиот да го пушти да се движи по улиците во потрага по ударни дупки. Подвижната мини фабрика се движи користејќи автономна технологија, односно системи коишто ги препознаваат околните објекти и белези, како далноводи, сообраќајни ленти или знаци, и при движењето се раководи според нив. Кога ќе открие ударна дупка во патот, роботот го вклучува 3D-печатарот и ја пополнува дупката со асфалт или соодветен материјал. На техниката ќе ѝ биде потребно уште малку време за созревање, но дека таа функционира докажува прототипот што моментно се користи за поправка на дупки во површини под мраз.